Prezident Shavkat Mirziyoev 16-mart kúni Almalıq kán-metallurgiya kombinatına barıp, 3-mıs bayıtıw fabrikasın iske qosıw máresiminde qatnastı. Sonday-aq, mámleketimiz basshısı mıs koncentratın islep shıǵarıw procesi hám kombinatta shólkemlestirilgen Sanlastırılǵan basqarıw orayınıń jumısı menen tanıstı, taw-kán sanaatındaǵı iri investiciyalıq joybarlardı jedellestiriw ilajları boyınsha májilis ótkerdi.
Mámleketimiz basshısı dáslep 3-mıs bayıtıw fabrikasın iske qosıw máresiminde qatnastı.
Elimizde sanaat, energetika, infrastruktura, servis tarawlarında kóplegen iri joybarlar iske qosılmaqta. Hár bir aymaqta jańa turaq jay massivleri, bilimlendiriw hám medicina mákemeleri, turizm hám mádeniyat dárgayları qurılmaqta.
Mámleketimiz sanaatınıń rawajlanıwı ushın strategiyalıq áhmiyetke iye bolǵan 3-mıs bayıtıw fabrikası da mine usınday keń kólemli jumıslar hám dóretiwshi xalqımızdıń pidákerlik miynetiniń jemisi bolıp esaplanadı.
“Yoshlik-1” kánin ózlestiriw baǵdarlaması sheńberinde 196 gektar maydanda ámelge asırılıp atırǵan bahası 2 milliard 700 million dollarlıq bul joybar tek ǵana kárxana emes, al mámleketimizdiń sanaat qúdiretin jáne de bekkemleytuǵın, tábiyiy baylıqlarımızdı tereń qayta islewge xızmet etetuǵın zamanagóy industriallıq kompleks bolıp esaplanadı.
Fabrika jılına 60 million tonna rudanı qayta islep, 900 mıń tonnaǵa shamalas mıs koncentratın islep shıǵarıw quwatlılıǵı menen tek ǵana Oraylıq Aziyadaǵı eń iri mıs islep shıǵarıwshı komplekslerden biri emes, al dúnyadaǵı iri bayıtıw fabrikalarınıń qatarına kiredi.
Joybardı jáhán standartları dárejesinde ámelge asırıw maqsetinde Italiyanıń “Wood”, Ullı Britaniyanıń “Worley Parsons” sıyaqlı kompaniyaları tartıldı. Fabrikada dúnyanıń jetekshi kompaniyaları – “Metso”, “FLSmidth”, “Weir Minerals” hám “Siemens” texnologiyaları engizilgen.
Bul joybar aymaqtaǵı túrles sanaat tarmaqlarınıń rawajlanıwına da kúshli túrtki berdi. Qurılısta paydalanılǵan metall konstrukciyalar kólemine teń materialdan 10 Eyfel minarasın, temir-beton sarpına derlik 2,5 Burj Xalifa minarasın qurıw múmkin. Bul fabrikanıń megajoybar ekenin jáne bir márte tastıyıqlaydı.
“Jasıl mákan” ulıwma milliy baǵdarlaması sheńberinde fabrika aymaǵında keń kólemli kóklemzarlastırıw hám abadanlastırıw jumısları ámelge asırılmaqta. Tamshılatıp suwǵarıw sistemaları hám ekodizayn sheshimleri sanaat hám tábiyat teń salmaqlılıǵın támiyinlewge xızmet etedi.
Prezidentimiz óziniń shıǵıp sóylegen sózinde sońǵı jılları taw-kán sanaatında ámelge asırılǵan reformalardıń nátiyjeleri hám keleshektegi rejeler haqqında aytıp ótti.
Kánlerdi investorlarǵa beriw boyınsha ashıq-aydın sistema jaratılǵanı esabınan toǵız jılda 10 milliard dollar sırt el investiciyası kirgizildi. Búgin tarawda 65 jeke menshik kárxana jumıs alıp barmaqta.
Nátiyjede tarmaqta óndiris 1,7 esege ósip, ótken jılı 270 trillion sumǵa jetti. Sanaat kólemi hám byudjetke túsimlerdiń tórtten bir bólegi usı tarmaqtıń úlesine tuwra kelmekte. Áhmiyetlisi, joqarı dáramatlı eń kóp jumıs orınları da mine usı tarawdaǵı kárxanalarda.
Sırt elli birge islesiwshiler menen joqarı maman kadrlardı tayarlaw jolǵa qoyılǵanı da eń úlken jetiskenliklerden biri ekeni atap ótildi.
Atap aytqanda, Almalıqta “Moskva polat hám aralaspalar institutı” universitetiniń filialı (“MISiS”), Almalıq texnika institutı, Tashkent qalasında Geologiya ilimleri universiteti (Uxan geologiya universiteti menen birgelikte) hám Italiyanıń Piza universitetiniń filialı shólkemlestirildi. Nawayı kánshilik texnologiyaları universitetinde de Rossiya, Kanada, AQSh, Franciya hám CHilidiń aldınǵı joqarı oqıw orınları menen birgeliktegi baǵdarlamalar jolǵa qoyıldı.
Bunıń nátiyjesinde, burın bahalı hám reńli metallar tiykarınan shiyki zat túrinde eksport etilgen bolsa, búgin jılına 100 mıń tonna mıs ózimizde qayta islenip, joqarı qunlı ónim jaratılmaqta, qısqa múddette zergerlik sanaatında óndiris 3,3 esege ósip, 13 trillion sumnan astı.
Prezidentimiz usı jıldıń ózinde iske qosılatuǵın joybarlardı esapqa alıp, mıstı tereń qayta islew quwatlıqları 240 mıń tonnaǵa jetetuǵının atap ótti. Jaqın eki-úsh jıldaǵı jańa joybarlar nátiyjesinde bul kórsetkishler jáne de artadı.
Mıs sanaat, energetika, elektrotexnika, sanlı ekonomika, jasalma intellekt, “jasıl” rawajlanıw ushın strategiyalıq shiyki zatqa aylanǵanı kórsetip ótildi.
– Kimde kim mıs sanaatında joqarı qun shınjırın jaratsa, keleshek sanaatın jaratqan boladı. Qaysı mámleket bul shiyki zattı tereń qayta islew ushın kúshli infrastruktura jaratsa, ol mıńlaǵan shańaraqlarǵa dáramat, aymaqlarǵa rawajlanıw, mámleketke qúdiret alıp keledi. Sonıń ushın, biz reformalarımızdıń dáslepki kúnlerinen geologiya-izlew jumıslarına ayrıqsha itibar qaratıp, bar rezervler hám olardı iske qosıw boyınsha imkaniyatlarımızdı belgilep aldıq, – dedi mámleketimiz basshısı.
Tek ǵana “Yoshlik-1” káninen usı jıldıń ózinde 20 million tonna ruda qazıp alınadı. Bul san kelesi eki jılda 60 million tonnaǵa jetedi.
Ulıwma, “Yoshlik-1” hám “Qalmoqqir” kánlerinde 45 million tonna mıs, 5 mıń tonnadan aslam altın rezerviniń bar ekenligi, bul rezerv sanaatqa keminde 100 jılǵa jetetuǵın kepillikli shiyki zat bazası bolatuǵını atap ótildi. Kánlerdegi molibden, selen, tellur, reniy sıyaqlı siyrek ushırasatuǵın metallar jańa innovaciyalıq baǵdarlardaǵı joybarlar ushın bekkem tiykar jaratadı.
3-mıs bayıtıw fabrikası tolıq iske qosılǵannan keyin Almalıq kombinatında mıs koncentratınıń kúnlik kólemi házirgi 2 mıń 400 tonnadan 5 mıń tonnaǵa artadı. Sonıń menen birge, joybar sheńberinde 6 mıńnan aslam jaslar joqarı dáramatlı jumıs ornına iye boladı. Fabrikada AQSh, Germaniya, Rossiya, Qıtay hám Finlyandiyanıń taw-kán sanaatındaǵı eń aldınǵı texnologiyaları engizilmekte. Barlıq texnologiyalıq processler sanlastırılıp, jasalma intellekt tiykarında birden-bir basqarıw sistemasına jalǵanadı. Bulardıń esabınan energiya jumsalıwı 10 procentke, ózine túser bahası 15 procentke azayadı, miynet ónimdarlıǵı bolsa 10 procentke artadı.
Bunnan tısqarı, bahası 2,5 milliard dollarlıq jańa mıs eritiw zavodın qurıw boyınsha da jumıslar baslanǵan.
Ulıwma, bul 2 iri quwatlıq esabınan mıs katodı islep shıǵarıwdıń jıllıq kólemi 148,5 mıń tonnadan 300 mıń tonnaǵa, altın 20 tonnadan 33 tonnaǵa, gúmis 161 tonnadan 203 tonnaǵa, molibden 850 tonnadan 1,7 mıń tonnaǵa jetetuǵını atap ótildi. Sonıń menen birge, uran qazıp alıw hám ximiya sanaatı ushın zárúr shiyki zat bolǵan sulfat kislotasın islep shıǵarıw 3 esege artadı.
Prezidentimiz bul kórsetkishlerdi jáne 1,5 esege arttırıwǵa xızmet etetuǵın 4-mıs bayıtıw fabrikası boyınsha joybaraldı jumıslar jedel alıp barılıp atırǵanın atap ótti.
Ózbekstan 2030-jılǵa shekem altın islep shıǵarıwdı 175 tonnaǵa, gúmiste 500 tonnaǵa, uranda 15 mıń tonnaǵa, mısta 500 mıń tonnaǵa jetkeriwdi maqset etken. Bul baǵdarda ámelge asırılıp atırǵan 22 milliard dollarlıq joybarlar sheńberinde jaratılatuǵın 40 mıńǵa shamalas joqarı dáramatlı jumıs orınları jaslarımız ushın úlken imkaniyat boladı.
Mámleketimiz basshısı fabrikanı qurıwda belsene qatnasıp atırǵan barlıq jumısshı-xızmetkerler, qurılısshı hám mashinistler, injener hám texnologlar, geolog hám kánshiler, óziniń tájiriybesi hám kásiplik potencialı menen jaslarǵa ustazlıq etip atırǵan veteranlar, joybarǵa óz úlesin qosıp atırǵan sırt elli sheriklerge tereń minnetdarshılıq bildirdi. Fabrikanıń jańa miynet jámáátine bolsa keleshektegi jumıslarında úlken tabıslar tiledi.
Kombinat jumısshıları, miynet veteranları, professor-oqıtıwshılar menen sóylesiw boldı.
Máresim juwmaǵında mámleketimiz basshısı rámziy túymeni basıp, fabrikanıń jumısına start berdi.
Bunnan soń Prezident Shavkat Mirziyoev Almalıq kán-metallurgiya kombinatında qurılǵan mıs koncentratın filtrlew korpusında boldı.
3-mıs bayıtıw fabrikasınıń quramındaǵı korpus jılına 917 mıń tonnaǵa shamalas mıs koncentratın islep shıǵarıw quwatlılıǵına iye. Zamanagóy sanaat press-filtrleri, nasos agregatları, shlam hám suw aylanısı sistemaları ornatılǵan. Úskeneler xalıqaralıq standartlar tiykarında islep shıǵarılǵan bolıp, joqarı nátiyjeliligi hám energiya únemlewshiligi menen ajıralıp turadı.
Házirgi waqıtta qurılıs jumısları tolıq juwmaqlanıp, korpusta ulıwma 5 press-filtrden úshewi tolıq iske qosılǵan, jáne ekewi iske qosıwǵa tayarlanbaqta.
Filtrlew korpusında flotaciya procesinen kelgen mıs koncentratın qabıllaw, koncentrattı qoyıwlandırıw hám filtrlew, tınıqtırılǵan suwdı ajıratıw hám qayta islewge qaytarıw, tayar mıs koncentratın saqlaw yamasa keyingi qayta islew basqıshına beriw sıyaqlı texnologiyalıq processler ámelge asırıladı.
Búgingi kúnde bul jerde 130 ǵa shamalas jumısshı miynet etpekte.
Mámleketimiz basshısı jumıs procesin hám tayar ónimdi kózden ótkerdi, xızmetkerler menen sáwbetlesti.
Prezidentimizdiń qatnasıwında usı jerdiń ózinde mıs koncentratınan úlgiler alıw máresimi ótkerildi. Úlgiler 2 bólek ıdısqa salınıp, Almalıq kombinatı muzeyi hám Tashkenttegi Mámleketlik geologiya muzeyine jiberildi.
Prezident Shavkat Mirziyoev Almalıq kán-metallurgiya kombinatında shólkemlestirilgen Sanlastırılǵan basqarıw orayınıń jumısı menen tanıstı.
Bul oray kombinattıń 1-, 2- hám 3-mıs bayıtıw fabrikalarındaǵı óndiris processlerin muwapıqlastırıw, nátiyjelilikti arttırıw hám úzliksiz monitoringti támiyinlewde áhmiyetli orın ielemekte.
Zamanagóy sanlı basqarıw sistemaları, úlken ekranlı monitoring panelleri, videobaqlaw quralları, sonday-aq, “Siemens PCS 7” hám “AVEVA PI Vision” platformaları arqalı maydalaw, flotaciyalaw, qoyıwlastırıw, filtrlew, reagentler menen támiyinlew, texnologiyalıq suw támiynatı, cexlar hám transport sistemasınıń jumısı real waqıt rejiminde qadaǵalanbaqta.
Basqasha aytqanda, bul oray fabrikanıń ózine tán “miyi” bolıp, jigirma mıńnan aslam úskene birden-bir málimleme sistemasına jalǵanǵan.
“Aqıllı” kameralar arqalı dáslepki monitoring ámelge asırıladı, jasalma intellekt járdeminde bolsa anomallıq jaǵdaylar avtomatikalıq túrde anıqlanadı. Bul maǵlıwmatlardı birden-bir málimleme sisteması arqalı tallaw hám operativ qararlar qabıl etiw imkaniyatın beredi.
Prezidentimiz oraydıń jumısı menen tanısıp, jasalma intellekt arqalı, ásirese, taw-kán hám metallurgiya tarmaqlarında nátiyjelilikti arttırıw boyınsha úlken imkaniyatlar bar ekenin atap ótti. Sonıń menen birge, suw resurslarınan aqılǵa uǵras paydalanıw maqsetinde zamanagóy resurs únemlewshi texnologiyalardı keńnen engiziw zárúrligine ayrıqsha itibar qaratıldı.
Usı jerdiń ózinde mámleketimiz basshısına kombinattıń óndirislik hám texnologiyalıq processlerin jáne de sanlastırıw boyınsha rejeler tanıstırıldı.
Atap ótilgenindey, kánnen ruda qazıp alıwdan baslap tayar ónim islep shıǵarıwǵa shekemgi barlıq processler basqıshpa-basqısh sanlastırılmaqta. Kelesi bes jılda hár bir basqıshqa jasalma intellekt sheshimlerin keńnen engiziw názerde tutılǵan.
Seksen jıl dawamında toplanǵan geologiyalıq hám marksheyderlik maǵlıwmatlar tiykarında kánlerdi sanlastırıw jumıslarınıń barısı haqqında da málimleme berildi. Sonıń ishinde, “Sanlı kán” sisteması kúnlik, háptelik hám aylıq qazıw jumıslarınıń anıq baǵdarların belgilew imkaniyatın bermekte.
Jasalma intellekt tiykarında karer jollarınıń jaǵdayı qadaǵalanbaqta, samosval shınlarınıń basımı hám temperaturası sensorlar arqalı baqlap barılmaqta. Mine usınday turaqlı monitoring nátiyjesinde shinalardıń xızmet múddeti 14 procentke arttırılǵan.
Tarawda zamanagóy texnologiyalardı tereń ózlestirgen qánigeler tayarlaw, kadrlardı jańa jumıs usılları hám sanlı sheshimler tiykarında oqıtıw tiykarǵı wazıypalardan biri ekeni kórsetip ótildi.
Patent jumıslarınıń kólemin keńeytiw máselesine de ayrıqsha itibar qaratıldı. Fabrikadaǵı hár bir basqıshta qollanılıp atırǵan ilimiy-texnologiyalıq sheshimlerdi patentlew, bul baǵdarda wákillikli shólkemler menen birge islesiwdi kúsheytiw, perspektivalı innovaciyalıq baǵdarlardı belgilep alıw zárúrligi atap ótildi.
Atap ótilgenindey, jańa patent bul – jańa texnologiya, jańa óndiris baǵdarı hám jańa bazarlar, demek. Mámleketimizdegi bay shiyki zat bazası dúnya bazarlarına shıǵıw ushın keń imkaniyatlar jaratıp atırǵanın esapqa alıp, 2026-jılı qaysı perspektivalı baǵdarlarda jáne qansha patent alıw múmkin ekenligi boyınsha anıq kózqaraslardı islep shıǵıw wazıypası qoyıldı.
Prezident Shavkat Mirziyoev Almalıq kán-metallurgiya kombinatına saparı sheńberinde taw-kán sanaatında ámelge asırılıp atırǵan iri investiciyalıq joybarlardı jedellestiriw boyınsha májilis ótkerdi.
Atap ótilgenindey, búgingi kúnde málimleme texnologiyaları, jasalma intellekt, robototexnika, energetika, elektrotexnika, ximiya hám qorǵanıw sanaatı sıyaqlı strategiyalıq tarmaqlardı jedel rawajlandırıw kóp jaǵınan mıs, uran, litiy, volfram hám basqa da áhmiyetli metallar bazasına súyenedi. Dúnya bazarlarında bul resurslarǵa talap artıp baratırǵanı, sonıń ishinde, mıs koncentratı bazarında jetispewshiliktiń kúsheyip, bahalardıń ósiwi kútilip atırǵanı taw-kán hám metallurgiya tarawındaǵı joybarlardı jedellestiriwdi jáne de áhmiyetli etip qoymaqta.
Usı múnásibet penen 2030-jılǵa shekem Ózbekstanda altın islep shıǵarıwdı 175 tonnaǵa, gúmisti 500 tonnaǵa, urandı 15 mıń tonnaǵa, mıstı 500 mıń tonnaǵa jetkeriw boyınsha belgilengen sheklerge erisiw ushın barlıq imkaniyatlardı tolıq jumsaw zárúrligi atap ótildi.
Bul baǵdarda hár bir iri joybardı anıq grafik tiykarında ámelge asırıw, qarjılandırıw, qurılıs, logistika, texnologiyalıq úskenelew hám kadrlar menen támiyinlew máselelerin óz-ara úylesikli halda sheshiw áhmiyetli ekenligi kórsetip ótildi.
Májiliste, bárinen burın, Almalıq kán-metallurgiya kombinatında ámelge asırılıp atırǵan strategiyalıq joybarlardıń barısı sın kózqarastan kórip shıǵıldı. Atap aytqanda, 3-mıs bayıtıw fabrikasınıń keyingi náwbetlerin jedellestiriw boyınsha anıq tapsırmalar berildi.
Sonday-aq, bul joybardıń texnologiyalıq dawamı esaplanǵan jańa mıs eritiw zavodın qurıw máseleleri de kórip shıǵıldı. Onda texnikalıq-ekonomikalıq tiykardı juwmaqlaw, sırt el ekspertlerin tartıw, qısqa múddetlerde qurılıs jumısların baslaw boyınsha juwapkerlerge anıq wazıypalar júklendi.
Almalıq kombinatınıń keleshektegi talaplarınan kelip shıǵıp, 4-mıs bayıtıw fabrikası boyınsha texnikalıq-ekonomikalıq tiykardı islep shıǵıw ushın abıraylı xalıqaralıq kompaniyalardı tartıw wazıypası ayrıqsha kórsetip ótildi. Bul hújjette suw támiynatı, temir jol, energetika infrastrukturası, ekologiyalıq talaplar hám joqarı nátiyjeli texnologiyalardı kompleksli qamtıp alıw zárúr ekenligi atap ótildi.
Májiliste usı jılı tarmaqta 90 joybar sheńberinde 2 milliard 200 million dollar investiciya tartıw, 172,5 mıń tonna mıs, 120 tonna altın, 210,5 tonna gúmis hám 8 mıń tonna uran islep shıǵarıw wazıypaları belgilengeni atap ótildi.
Sonıń menen birge, bir qatar perspektivalı kánler hám obektler boyınsha texnikalıq-ekonomikalıq tiykarlardı tez pursatta juwmaqlaw, ekspertiza processlerin ápiwayılastırıw boyınsha qabıl etilgen jańa qarardıń imkaniyatlarınan nátiyjeli paydalanıw zárúr ekenligi atap ótildi. Húkimetke usı joybarlar sheńberindegi shólkemlestiriwshilik hám huqıqıy máselelerdi qısqa múddette sheshiw tapsırıldı.
Energetika resurslarına bolǵan talap artıp baratırǵan sharayatta kómir qazıp shıǵarıw hám onı qayta islew joybarların jedellestiriw máselelerine de ayrıqsha itibar qaratıldı. Xalıq hám sanaat kárxanalarına kómir jetkerip beriw kólemin arttırıw boyınsha wazıypalar belgilendi.
Nawayı kán-metallurgiya kombinatınıń jumısı sheńberinde “Murıntaw” kánin keńeytiwdiń gezektegi basqıshı, jańa kánlerdi ózlestiriw, quramalı rudalardan altın ajıratıp alıw texnologiyaların engiziw, sonday-aq, ayırım iri joybarlar boyınsha investorlar menen birge islesiw mexanizmlerin qayta kórip shıǵıw boyınsha tapsırmalar berildi.
Metallurgiya baǵdarında “Ózmetkombinat”ta óndiris kólemin arttırıw, ishki shiyki zat bazasidan nátiyjeli paydalanıw, básekige shıdamlı ónim túrlerin kóbeytiw, bazar talabına sáykes metall listler islep shıǵarıwdı jolǵa qoyıw máseleleri kórip shıǵıldı. Bul baǵdarda shiyki zat támiynatı, ónim túrlerin diversifikaciyalaw hám jańa bazarlardı ózlestiriw boyınsha anıq ilajlar belgilendi.
Májiliste Texnologiyalıq metallar kombinatınıń jumısına da toqtap ótip, sanaat ushın áhmiyetli bolǵan metallar hám quramalı quymalar islep shıǵarıwdı keńeytiw, selen, tellur, untaq metallurgiyası detalları hám basqa da qosımsha qunlı ónimler islep shıǵarıw boyınsha joybarlardı jedellestiriw wazıypası qoyıldı.
Tarmaq kárxanalarında ózine túser bahanı azaytıw hám qárejetlerdi qısqartıw máseleleri de dıqqat orayında boldı. Juwapkerlerge bir birlik ónimniń ózine túser bahasın qısqartıw, energiya jumsalıwın azaytıw, resurslardan únemli paydalanıw hám ayma-ay anıq nátiyjelerge erisiw boyınsha mánzilli baǵdarlamalar islep shıǵıw tapsırıldı.
Mámleketlik satıp alıwlar hám kooperaciya tarawında jergilikli komponentti keńeytiwge ayrıqsha itibar berildi. Sol sebepli, juwapkerlerge joybarlar hám satıp alıwlarda jergilikli komponenttiń úlesin usı jılı 2 milliard dollardan arttırıw boyınsha anıq kórsetkishler belgilep berildi.
Sonday-aq, geologiyalıq-izlew jumısların kúsheytiw, qosımsha rezervlerdi anıqlaw, jańa kán hám investiciyalıq bloklardı investorlarǵa usınıs etiw, uglevodorodqa perspektivalı maydanlardı ekonomikaǵa tartıw boyınsha rejeler dodalandı. Bul baǵdarda usı jılı altın, gúmis, mıs, uran hám cink rezervlerin sezilerli dárejede arttırıw wazıypası qoyıldı.
Májiliste tarawda ámelge asırılıp atırǵan 22 milliard dollarlıq joybarlar sheńberinde 38 mıń jańa jumıs ornı jaratılatuǵını, sonıń ishinde, 7,5 mıń injener hám 14 mıń orta buwın qánigelerine talap payda bolatuǵını atap ótildi. Usı múnásibet penen tarawdaǵı joqarı bilimlendiriw mákemeleri hám texnikumlardıń jumısın jańa talaplar tiykarında shólkemlestiriw, bilimlendiriw baǵdarlamaların zamanagóy texnologiyalarǵa beyimlestiriw, dual bilimlendiriwdi keńnen engiziw, diplom jumısların tikkeley óndiris wazıypaları menen baylanıstırıw boyınsha kórsetpeler berildi.
Bunnan tısqarı, joqarı oqıw orınlarındaǵı ilimiy izertlewlerdi kombinatlardaǵı ámeliy texnologiyalıq sheshimlerge baǵdarlaw, ilimiy jumıslardıń nátiyjelerin óndiriske engiziw, studentler ushın oqıw-shınıǵıw poligonların shólkemlestiriw, sanaat kárxanalarında cexlardı ámeliyat hám izertlewler ushın beyimlestiriw wazıypaları belgilendi.
Jańa joybarlar sheńberindegi áhmiyetli ilimiy temalar dizimin ashıq járiyalaw sistemasın jolǵa qoyıw tapsırıldı. Bul izertlewlerde tarawdaǵı 5 joqarı oqıw ornı menen bir qatarda texnika baǵdarındaǵı barlıq mámleketlik, jeke menshik joqarı oqıw ornı hám ilimiy shólkemler qatnasıwı múmkin boladı.
Májilis juwmaǵında taw-kán, metallurgiya, ximiya hám neft-gaz sıyaqlı bazalıq tarmaqlarda iri joybarlardıń orınlanıwın sistemalı qadaǵalaw maqsetinde Prezident basshılıǵında Sanaat keńesi dúziletuǵını málim etildi. Bul keńes sheńberinde iri kárxanalardı xalıqaralıq standartlar tiykarında transformaciyalaw, ózine túser bahanı hám energiya jumsalıwın azaytıw, shiyki zattı tereń qayta islew, jergilikli kontentti arttırıw, barlıq processlerdi sanlastırıw, jasalma intellektti engiziw, investiciya hám eksporttı kóbeytiw boyınsha aylıq jumıs rejeleri tastıyıqlanadı.
Juwapker basshılarǵa bul rejelerdiń orınlanıwın hár ayda orınlarǵa shıqqan halda kárxana kesiminde sın kózqarastan dodalap barıw, bar máselelerdi jedel sheshiw hám hár sherektiń juwmaqları boyınsha esabat kirgizip barıw tapsırıldı.

ÓzA