Prezident Shavkat Mirziyoevtiń basshılıǵında xalıqtıń múrájatları menen islesiw sistemasın jetilistiriw boyınsha videoselektor májilisi baslandı.
Elimiz xalqı 38 millionnan, miynetke jaramlı xalıq 20 millionnan astı, sońǵı toǵız jılda xalıqtıń dáramatı 2 esege kóbeydi.
Xalqımızdıń awırın jeńilletiw, kótergen máselelerine sheshim tabıw boyınsha ministr hám hákimler máhálle dárejesinde isleytuǵın sistema jaratıldı. Bıyıl da máhállelerde xalıqtıń turmısın jaqsılawǵa 56 trillion sum ajıratılmaqta.
– Endi ministrler, hákimler ózine soraw bersin: sonsha imkaniyat bola tura, xalıq kótergen máselelerge waqtında sheshim tawıp berip atır ma? Bunnan toǵız jıl burın Xalıq qabıllawxanaları shólkemlestirilgende bir maqset qoyılǵan edi: mámleketlik uyımlardı xalıqqa jaqınlastırıw.
Durıs, Xalıq qabıllawxanaları waqtında nátiyjeli isledi. Biraq bul uyımdı da adamlardıń búgingi talabına say túrde ózgertiw waqtı keldi, – dedi Prezidentimiz.
Bunnan keyin “Hár bir insan hám shańaraqtıń mashqalasın bilip, waqtında járdem beriwim kerek” degen súren hár bir rayon, qala, wálayat hákimi, ministr, onıń aymaqlıq shólkem basshılarınıń bas qaǵıydası bolıwı zárúr ekenligi atap ótildi.
ÓzA