“Keyingisi biz bolamiz”: Rossiyalı deputat AQShtıń Irannan keyingi nıshanı Rossiya ekenin ayttı
Rossiya Kommunistlik partiyasınıń baslıǵı Gennadiy Zyuganov Mámleketlik dumadaǵı shıǵıp sóylegen sózinde Jaqın Shıǵıstaǵı urıs AQShtıń keń strategiyasınıń bir bólegi ekenin hám keleshekte Rossiyaǵa da qáwip salıwın atap ótti. Ol Persiya qoltıǵında júz berip atırǵan waqıyalardı “Amerika imperializminiń nıqapları alıp taslanǵanın” kórsetetuǵının hám AQSh siyasatın “basqınshılıq hám zorlıq” dep ataytuǵının ayttı. Zyuganovtıń sózlerine bola, Iran hám AQSh arasındaǵı áskeriy háreketler regionda suw hám azıq-awqat támiynatına unamsız tásir etpekte.
Iran prezidenti urıstı tamamlaw ushın shárt qoydı
Iran prezidenti Masud Pezeshkian urıstı tamamlaw ushın mámlekettiń huqıqların tán alıw, kompensaciya tólew hám keleshektegi agressiyaǵa qarsı qáwipsizlik kepilliklerin beriwdi tiykarǵı shárt etip qoydı. Ol X sociallıq tarmaǵında Rossiya hám Pakistan basshılarına regionda tınıshlıq tárepdarı ekenin atap ótken hám AQSh hám Izrail baslaǵan áskeriy háreketlerdi toqtatıwdıń birden-bir jolı usı shártlerdi orınlaw ekenin jazǵan.
Franciya Aleksey hám Mariya Moskalyovlarǵa qorǵanıw usındı
Rossiya puqarası Aleksey Moskalyov hám onıń qızı Mariya urısqa qarsı salǵan súwreti hám sociallıq tarmaqlardaǵı pikirleri sebepli Rossiyada quwdalawǵa ushıraǵannan keyin, Franciya olardı gumanitarlıq qorǵaw menen qabılladı. Parijge kelgen Moskalyovlarǵa vizalar hám sırt elge shıǵıw pasportısız mámleketke kiriw hújjeti berildi, Aleksey eki jıl koloniyada qamalǵan, qız bolsa qáwenderlikke berilgen.
Moldova húkimeti mámlekettiń ǴMDAdan shıǵıwın maqulladı
Moldova húkimeti 11-mart kúni mámlekettiń Ǵárezsiz mámleketlerdiń doslıq awqamına (ǴMDA) aǵzalıǵına baylanıslı tiykarǵı kelisimlerdi biykarlawdı qollap-quwatladı. Eger parlament te tastıyıqlasa, nızam joybarı prezident Mayya Sanduǵa qol qoyıw ushın jiberiledi hám ǴMDAdan shıǵıw procesi baslanadı. Sırtqı isler ministri bul qádemdi Evropa baǵdarın bekkemlew sıpatında bahaladı.
Norvegiyada AQSh dipmissiyası janındaǵı teraktte gúmanlanǵanlar qolǵa alındı
Osloda tiykarınan Iraklı, biraq Norvegiya puqarası bolǵan úsh aǵayin 8-martqa ótetuǵın túnde AQSh elshixanasınıń kiriw bólimi janında júz bergen jarılıwda gúmanlanıp qolǵa alındı. Policiya tergew alıp barıp, olar adamlardı óltiriw yamasa úlken zıyan jetkeriw maqsetinde kúshli jarılıwshı qurılmadan paydalanǵan dep esaplamaqta, FTB hám Interpol menen birge islespekte.
Qıtayda derlik 1 kilometrlik eskalator iske tústi
Qıtaydıń Ushan rayonında jańa Wushan Goddess Escalator kompleksi ashıldı, ol xalıqtı tawlı aymaqlarda ańsat háreketleniwin támiyinleydi. Ulıwma uzınlıǵı 905 metr bolǵan eskalator sisteması 242 metr biyiklikke kóteriledi hám aldın bir saat dawam etken piyada joldı jigirma minutqa qısqartadı. Imarat “tawdı qushaqlap turıwshı” dizaynı menen ajıralıp turadı hám dúnyadaǵı eń uzın qala eskalatorı sıpatında rekord ornattı.
Qaraqalpaqstan xabar agentligi