Hár qanday mámlekettiń tariyxıy rawajlanıw jolınan belgili bolǵanınday, eldiń jedel rawajlanıwı, belgili bir jetiskenliklerge erisiwi, xalıqtıń abadanlıǵı sol mámlekette jaslardıń tálim-tárbiyasına hám keleshegine beriletuǵın itibar dárejesi menen tıǵız baylanıslı. Usı mániste, Ózbekstanda jaslar máselesi mámleketlik siyasattıń eń tiykarǵı baǵdarlarınan biri bolıp esaplanadı. Búgingi kúnde jaslarǵa bolǵan itibar mámleketlik siyasattıń baslı baǵdarlarınıń birine aylanıp, olardıń pikir hám baslamaların qollap-quwatlaw, mashqalaların óz waqtında sheshiw maqsetinde keń kólemli jumıslar ámelge asırılmaqta. Usı tiykarda Prezidentimizdiń baslaması menen hár hápteniń piyshembi kúni “Jaslar kúni” sıpatında belgilendi.
Mine usı iygilikli baslama sheńberinde Qaraqalpaqstan Respublikası Joqarǵı Keńesiniń Baslıǵı Amanbay Orınbaev Taqıyatas rayonındaǵı bir qatar jumıssız hám atalıqqa alınǵan jaslar menen ushırasıw ótkerdi.
Onda Joqarǵı Keńes Baslıǵı mámleketimizde jaslarǵa qaratılıp atırǵan joqarı itibar, olardıń bilim alıwı, kásip-óner iyelewi hám óz potencialın kórsetiwi ushın jaratılıp atırǵan imkaniyatlar haqqında ayrıqsha sóz etti.
Ushırasıw dawamında jaslar da belsene qatnasıp, ózlerin qızıqtırǵan máseleler, mashqala hám usınısların ashıq hám erkin túrde bildirdi.
Onda jumıs penen támiyinlew, isbilermenlik jumısın jolǵa qoyıw, jeńilletilgen kreditler alıw, kásip-óner úyreniw hám bilimlendiriw tarawına tiyisli máseleler kóterilip, olardı unamlı sheshiw boyınsha juwapkerlerge anıq tapsırmalar berildi.
Qaraqalpaqstan xabar agentligi