Mámleketimiz Prezidentiniń tapsırması menen hápteniń hár piyshembi kúni jaslar kúni etip belgilengen edi. Usı tiykarda Qaraqalpaqstan Respublikası Joqarǵı Keńesiniń Baslıǵı Amanbay Orınbaev IT tarawında nátiyjeli jumıs júrgizip atırǵan bir topar jaslar menen ushırastı.
Ótkerilgen ushırasıwda eń dáslep respublikamız basshısı húrmetli Prezidentimiz basshılıǵında barlıq tarawlar sıyaqlı IT tarawına da ayrıqsha itibar qaratılıp, bul baǵdarda keń kólemli ilajlar ámelge asırılıp atırǵanlıǵın atap ótti. Sonıń ishinde bul zamanagóy taraw eń az qarjı jumsap, kóp payda alsa bolatuǵın keleshek kásipleriniń biri esaplanadı. Sonlıqtanda elimizde bul tarawdı rawajlandırıw hám onı qollap-quwatlawǵa ayrıqsha itibar qaratılıp, keń múmkinshilikler jaratıp berilmekte. Buǵan ayqın mısal sıpatında, Tashkent qalasınan basqa mámleketimizdiń birde-bir aymaǵında bolmaǵan 17 etajlı IT-Park imaratı Nókis qalasında qurılıp, búgingi kúni bul zamanagóy oray zeyinli jaslarımız ushın xızmet etip kelmekte. Álbette, bul jaslar ushın jaratılǵan imkaniyatlar, olarǵa bolǵan itibar mámleketlik siyasattıń baslı baǵdarlarınıń birine aylanıp atırǵanlıǵınıń kórinisi esaplanadı.
Respublikamız basshısı menen jaslardıń ótkerilgen bul ushırasıwında da mine usınday iygilikli jumıslar atap ótilip, tarawdı bunnan bılay da rawajlandırıw, frilanserlerdi qollap-quwatlaw, IT eksportın ele de arttırıw, startap joybarlardı ámelge asırıw baǵdarında jaslardıń pikir-usınısları tıńlandı.
Óz náwbetinde, jaslar tárepinen bir qatar áhmiyetli baslamalar, jumıs alıp barıw barısında ushırasıp atırǵan máseleler atap ótildi.
Ushırasıwda hár bir kóterilgen másele Joqarǵı Keńes Baslıǵınıń jeke qadaǵalawına alınıp, taraw juwapkerlerine bul mashqalalardı tez arada unamlı sheshiw boyınsha anıq tapsırmalar berildi.
Sonday-aq, ótkerilgen bul áhmiyetli ilaj dawamında qatar-qurbıları arasında óziniń umtılıwshańlıǵı hám ayrıqsha belsendiligi menen kópshilikke úlgi bolıp atırǵan bir topar jaslar Qaraqalpaqstan Respublikası Joqarǵı Keńesiniń Baslıǵı Amanbay Orınbaev tárepinen xoshametlenip, olarǵa Minnetdarshılıq xatları tapsırıldı.
Qaraqalpaqstan xabar agentligi