Italiya húkimeti sud sistemasındaǵı korrupciya hám toparǵa bóliniwge shek qoyıw maqsetinde áyyemgi Rim dástúrlerine tán qızıqlı usıldı engiziwge tayarlanbaqta. Bas ministr Djorja Meloni basshılıǵındaǵı konservativ húkimet sud sistemasın túp-tiykarınan reformalaw baslaması menen shıqtı.
Usı jılı 22-23-mart kúnleri Italiyada ulıwmaxalıqlıq referendum ótkeriliwi rejelestirilgen. Bul ilaj arqalı puqaralar sud sisteması basqarıw keńesi aǵzaların tosınnan tańlaw (lotereya) sistemasına ótiw máselesin sheshedi. Bul ózgeristen gózlengen tiykarǵı maqset túrli siyasiy kúshler arasında júz berip atırǵan jasırın kelisimlerdi saplastırıw bolıp tabıladı. Lotereya arqalı saylanǵan aǵzalar hesh bir siyasiy topar aldında ózin qarızdar dep esaplamaydı.
Bul reforma úsh tiykarǵı baǵdardı qamtıp aladı: sudya hám prokurorlardıń jumısı bir-birinen pútkilley ajıratıladı, sud sistemasınıń basqarıw keńesi eki ayrıqsha hám biyǵárez uyımǵa bólinedi, sistema xızmetkerleriniń qáte-kemshiliklerin qalıs kórip shıǵatuǵın jańa arnawlı intizamıy sud shólkemlestiriledi.
Húkimet basshısı RTL radiosına bergen intervyuinde bılay degen: Ádillik Italiyanı uslap turǵan úsh tiykarǵı baǵanalardan biri. Házir ámelge asırmasaq, bunday reforma imkaniyatı basqa kelmewi múmkin.
Qullası, Italiya sud sisteması ashıq-aydınlıǵı baǵdarında pútkilley jańa basqıshqa kóteriliwi kútilmekte.
Qaraqalpaqstan xabar agentligi