Prezident Shavkat Mirziyoev 10-mart kúni awıl hám suw xojalıǵı ushın injener kadrlar tayarlaw sistemasın jetilistiriw boyınsha usınıslar prezentaciyası menen tanıstı.
Kóp tarawlarda ilim real turmıstan uzaqlasıp ketkeni, awıl hám suw xojalıǵında da ayırım iri joybarlardı ámelge asırıwda ilimiy tiykarlaw hám ekspertizaǵa jeterli itibar qaratılmay atırǵanı, ilimpazlar hám izertlewshilerdiń potencialınan tolıq paydalanılmay atırǵanı atap ótildi. Nátiyjede ayırım joybarlar kútilgen nátiyjeni bermey atırǵanı atap ótildi.
Házirgi kúnde “Tashkent irrigaciya hám awıl xojalıǵın mexanizaciyalaw injenerleri institutı” milliy izertlew universitetinde 11 mıńnan aslam student bilim almaqta, 7 fakultet, 37 kafedra hám 38 bilimlendiriw baǵdarı jumıs alıp barmaqta. Pitkeriwshilerdiń bántlik dárejesi 93 procentti quraydı. Universitette sırt elli studentler hám professor-oqıtıwshılardıń sanı da izbe-iz artıp barmaqta.
Sonıń menen birge, injener kadrlardı tayarlawda teoriya hám ámeliyattıń úylesimliligin támiyinlew maqsetinde dual bilimlendiriw sistemasın keńnen engiziw zárúr ekenligi kórsetip ótildi.
Usınıs etilgen jańa sistemaǵa bola, studentler 4 kún teoriyalıq bilim aladı, 2 kún óndiris kárxanalarında haqı tólenetuǵın ámeliyat óteydi. Sonıń ishinde, suw xojalıǵı baǵdarında suwdı únemlew hám suwǵarıwdı nátiyjeli shólkemlestiriw, gidrotexnika hám gidroenergetika tarawında kanallardı betonlaw, smeta dúziw hám kishi gidroelektr stanciyalarınıń qurılısında qatnasıw, awıl xojalıǵın mexanizaciyalaw baǵdarında texnikalardı tayarlaw hám zúráátti jıynap alıw jumıslarında qatnasıw imkaniyatı jaratıladı.
Mámleketimiz suw resurslarınıń úlken bólegi transshegaralıq dereklerge baylanıslı ekenligi kórsetip ótildi. Sonlıqtan, suw resursları tarawında diplomat kadrlardı tayarlaw áhmiyetli strategiyalıq wazıypalardan biri ekeni atap ótildi.
Universitette shólkemlestirilgen “Xalıqaralıq suw diplomatiyası” magistratura baǵdarlamasın keńeytiw hám mámleketlik grant tiykarındaǵı qabıllaw orınların kóbeytiw usınısı maqullandı. Bul baǵdarlama arqalı qońsı mámleketler ushın joqarı mamanlıqtaǵı qánigeler tayarlaw názerde tutılǵan.
Prezentaciyada universitettiń ilimiy-innovaciyalıq potencialın kúsheytiwge qaratılǵan jańa baslamalar da málim etildi. Atap aytqanda, dronlardan paydalanıp, egislik maydanların monitoring etiw, ónimdarlıqtı boljaw, zıyankeslerge qarsı gúresiw sıyaqlı xızmetlerdi, kosmoslıq monitoring maǵlıwmatları tiykarında ilimiy usınıslar islep shıǵıwdı jolǵa qoyıw rejelestirilgen.
Usı maqsette universitette dronlardı basqarıwǵa oqıtıw kursları engiziledi, kosmoslıq izertlewler hám jasalma joldaslar laboratoriyası, kompleksli ilimiy-izertlew laboratoriyaları shólkemlestiriledi.
Bunnan tısqarı, universitette sanlı basqarıw hám KPI sistemaların engiziw, bilimlendiriwdiń úzliksiz “mektep – texnikum – universitet – óndiris” shınjırı tiykarında kadrlar tayarlaw sistemasın qáliplestiriw boyınsha rejeler de málim etildi.
Prezentaciyanıń juwmaǵında mámleketimiz basshısı awıl hám suw xojalıǵı tarawları ushın injener kadrlar tayarlaw sistemasın jetilistiriw, ilim hám ámeliyattıń úylesimliligin támiyinlew jáne aldınǵı texnologiyalardı keńnen engiziw boyınsha juwapkerlerge tiyisli kórsetpeler berdi.

ÓzA