Dúnya turistlerine usınıs etilgen mánziller qatarında Tashkent te bar

206

Tashkent hám Ózbekstandaǵı Islam civilizaciyası orayı Condé Nast Traveler tárepinen iyun ayında sayaxat etiw ushın eń jaqsı jónelisler qatarına kirgizildi.
Dúnya kóleminde sayaxat hám mádeniyat temaların sáwlelendiretuǵın abıraylı basılımlardan biri bolǵan Condé Nast Traveler Ózbekstan paytaxtı Tashkent qalası hám mámlekette qurılǵan Ózbekstandaǵı Islam civilizaciyası orayın iyun ayında barıw usınıs etiletuǵın eń jaqsı mánziller qatarına kirgizdi. Jurnaldıń “The Best Places to Visit in June, From Route 66 to Uzbekistan” atamasındaǵı materialında bul jónelisler dúnya boylap sayaxatshılar ushın itibarǵa ılayıq mádeniy hám tariyxıy orınlar sıpatında atap ótilgen.
Basılımda atap ótilgenindey, Tashkent Oraylıq Aziyadaǵı eń iri qalalardan biri bolıp, onıń tariyxıy rawajlanıwı dawamında túrli civilizaciyalar tásiri áhmiyetli orın iyelegen. Ullı Jipek jolı dáwirinen baslap arab dinastiyaları dáwiri hám keyingi tariyxıy basqıshlarǵa shekemgi bolǵan mádeniy tásirler qalanıń búgingi arxitekturasında da óz kórinisin tapqan. Sol sebepli paytaxtta Jipek jolı dáwiri estelikleriniń belgili kók gúmbezleri menen bir qatarda sovet modernizmine tán kórkem arxitekturalıq formalar da birgelikte bolıp, qala kórinisinde tariyxıy qatlamlardıń úylesimliligin kórsetedi.
Condé Nast Traveler basılımınıń maqalasında, ásirese, Ózbekstandaǵı Islam civilizaciyası orayına ayrıqsha itibar qaratılǵan. Avtorlar bul iri mádeniy-aǵartıwshılıq kompleks islam mádeniyatı, ilim hám ruwxıy miyras tariyxına baylanıslı bay maǵlıwmatlardı qamtıp alatuǵın muzey, kórgizbe hám bilimlendiriw maydanların óz ishine alatuǵının atap ótedi. Basılımnıń pikirinshe, bul oraydıń qurılıwı Ózbekstannıń jáhán mádeniy saxnasındaǵı abırayın bekkemlewge qaratılǵan áhmiyetli baslama bolıp esaplanadı.
Sonıń menen birge, maqalada Tashkentte zamanagóy mádeniy ortalıqtıń jedel rawajlanıp atırǵanı da ayrıqsha atap ótilgen. Atap aytqanda, paytaxtta Zamanagóy kórkem óner orayınıń ashılıwı hám qalanıń tariyxıy máhállelerinde xalıqaralıq kórkem rezidenciyalardıń payda bolıp atırǵanı mádeniy turmıstıń jáne de janlanıp atırǵanınan derek sıpatında kórsetilgen.
Tashkent qalası hám Ózbekstandaǵı Islam civilizaciyası orayınıń Condé Nast Traveler tárepinen usınıs etilgen sayaxat baǵdarları qatarına kirgiziliwi bul kompleks haqqındaǵı maǵlıwmatlar dúnyadaǵı bir qatar abıraylı basılımlarda da járiyalanǵanı menen jáne de úlken áhmiyetke iye bolmaqta. Sonıń ishinde, Smithsonian Magazine, BBC Travel, BBC History hám National Geographic sıyaqlı xalıqaralıq ǵalaba xabar qurallarında da bul oray haqqında materiallar basıp shıǵarılǵan.
Bunday tán alıwlar Ózbekstandaǵı Islam civilizaciyası orayın dúnya kólemindegi iri muzey baslamaları menen bir qatarda kórsetpekte. Olardıń qatarında Los-Anjeles qalasındaǵı Lucas Museum of Narrative Art, Vashingtondaǵı National Geographic Museum of Exploration hám Londondaǵı London Museum sıyaqlı mákemeler tilge alınadı.
Tashkent hám Ózbekstandaǵı Islam civilizaciyası orayınıń xalıqaralıq basılım tárepinen iyun ayında sayaxat etiw ushın usınıs etilgen baǵdarlar dizimine kirgiziliwi dúnya jámiyetshiliginiń mámlekettiń mádeniy miyrasına qızıǵıwshılıǵı artıp atırǵanın jáne bir márte tastıyıqlaydı. Bul bolsa Ózbekstannıń Oraylıq Aziyadaǵı áhmiyetli mádeniy hám turistlik oray sıpatındaǵı abırayın bekkemlewge xızmet etpekte.
Maǵlıwmat ornında aytıw kerek, Condé Nast Traveler sayaxat hám mádeniyat tarawındaǵı eń tásirli xalıqaralıq basılımlardan biri bolıp esaplanadı. Ol 1987-jılı AQShta shólkemlestirilgen bolıp, Condé Nast media xoldinginiń quramına kiredi. Bul xolding sonday-aq, Vogue, The New Yorker hám GQ sıyaqlı belgili jurnallardı da basıp shıǵaradı. Condé Nast Traveler jurnalı aylıq esapta 16 millionnan aslam globallıq oqıwshılar auditoriyasına iye bolıp, dúnya turizm industriyası ushın áhmiyetli baǵdarlawshı dereklerden biri sıpatında tán alınǵan. Basılım xalıqaralıq sayaxat hám mádeniy turizm tarawında kún tártibin qáliplestiriwde ayrıqsha áhmiyetke iye.
Tashkent qalası hám Ózbekstandaǵı Islam civilizaciyası orayınıń Condé Nast Traveler basılımı tárepinen iyun ayında sayaxat etiw ushın eń jaqsı mánziller qatarına kirgiziliwi mámlekettiń bay tariyxıy hám mádeniy miyrasına xalıqaralıq qızıǵıwshılıq artıp baratırǵanın jáne bir márte kórsetti.
Bul tán alıw tek ǵana Tashkenttiń mádeniy potencialın emes, al Ózbekstannıń globallıq turizm hám mádeniy pikirlesiw maydanındaǵı ornın da bekkemlewge xızmet etpekte.

M.Eshmirzaeva, ÓzA