Prezident Shavkat Mirziyoevtiń basshılıǵında videoselektor májilisi dawam etpekte.

Isbilermenler barlıq aymaqlarda da farmazonalar joq ekenligi sebepli, olarǵa berilgen salıq jeńilligin basqa kárxanalarǵa da qollanıwdı soraǵan. Prezidentimiz bunı qollap-quwatladı hám farmacevtika kárxanaları ushın jańa imkaniyatlardı járiyaladı.

Usı jıl 1-aprelden baslap qay jerde jaylasqanına qaramastan, jańa farmacevtika quralların islep shıǵarıw, dárilik ósimlikti jetistiriw hám qayta islew baǵdarındaǵı joybarlar baslanǵanınan baslap úsh jıl múddetke jer salıǵınan azat etiledi. Isbilermenler joybar iske qosılǵanınan baslap úsh jıl dawamında payda hám múlk salıqların tólemeydi.

Sonıń menen birge, biologiyalıq aktiv qosımsha hám kosmetika quralların islep shıǵarıwshılar da shiyki zat, úskene, awısıq hám komplektlewshi bóleklerdi import bajısınan azat etiledi, farmacevtika kárxanalarına óz liniyasında biologiyalıq aktiv qosımsha islep shıǵarıwǵa ruqsat beriledi.

Bunnan bılay hár jılı 1-iyulǵa shekem lokalizaciyalaw usınıs etiletuǵın dári quralları hám medicinalıq buyımlardıń dizimi isbilermenlerge járiyalanıp barıladı.

Dizimdegi dári-dármaqlardı islep shıǵarıw boyınsha joybar islemekshi bolǵan isbilermenlerge sırt el valyutasında 7 procentlik kreditler beriledi.

Sonday-aq, bar ónimleri boyınsha lokalizaciyalawdı tereńlestirmekshi bolǵan isbilermenlerge Sanaat kooperaciyası qorınan 10 jılǵa shekem sırt el valyutasında 6 procentlik, milliy valyutada 12 procentlik kredit ajıratıladı.

ÓzA