Prezident Shavkat Mirziyoevtiń basshılıǵında farmacevtika tarawın rawajlandırıw boyınsha tiykarǵı wazıypalarǵa baǵıshlanǵan videoselektor májilisi baslandı. Ilajda farmacevtika kárxanalarınıń wákilleri de qatnaspaqta.
– Medicinadaǵı keń kólemli reformalarımız, baslanǵısh buwında profilaktikanıń kúsheytiliwi keselliklerdi emlew menen birge onıń aldın alıwǵa qaratılǵan preparatlardı kóbeytiwdi talap etpekte, – dedi mámleketimiz basshısı.
Sonlıqtan, juwapkerlerdiń aldında usı jılı tarawǵa keminde 1 milliard dollar investiciya alıp keliw, sapanı arttırıw hám sırt eldiń jetik farmacevtika kompaniyaları menen birgelikte jańa óndiris quwatlıqların iske qosıw arqalı ishki tutınıwdaǵı jergilikli dári-dármaqlardıń úlesin 2030-jılǵa shekem 70 procentke jetkeriw, kelesi bes jılda eksporttı 1 milliard dollarǵa alıp shıǵıw wazıypalarınıń turǵanı atap ótildi.
Bul baǵdarda 100 den aslam islep shıǵarıwshılar, 50 den aslam importyorlar, 300 ge shamalas kótere hám usaqlap satıw kárxanaları, investorlar menen tarawdaǵı máseleler dodalandı, bildirilgen usınıs hám baslamalar tiykarında úlken qarar joybarı tayarlandı.
Soǵan qaramastan, hákimlerde aymaǵındaǵı farmacevtika kárxanaları menen sóylesip, olar kótergen máselelerge sheshim tabatuǵın sistema joq ekenligi kórsetip ótildi.

ÓzA