Ózbekstan Respublikası Prezidenti Shavkat Mirziyoev 4-mart kúni Oman Sultanı Haysam bin Toriq Ol Said, Birlesken Arab Ámirlikleri Prezidenti Shayx Muhammad bin Zoid Ol Nahayan, Kuveyt Mámleketi Miyrasxorı Shayx Saboh al-Xolid al-Hamad as-Saboh, Qatar Mámleketi Ámiri Shayx Tamim bin Hamad Ol Soniy, Baxreyn Patshası Hamad bin Iso Ol Xalifa hám Iordaniya Hoshimiyler Patshalıǵınıń Patshası Abdulla II ibn al-Husayn menen telefon arqalı sóylesti.
Oman Sultanı Haysam bin Toriq Ol Said penen sóylesiwde Jaqın Shıǵıstaǵı házirgi quramalı jaǵday dodalanıp, júzege kelgen turaqsızlıq ayrıqsha táshwish oyatıp atırǵanı atap ótildi.
Ózbekstan Prezidenti Oman aymaǵında júz bergen bunday háreketlerden qáweterde ekenin bildirip, Ózbekstan hár qanday qarama-qarsılıq hám kelispewshilikti siyasiy-diplomatiyalıq hám tınısh jollar menen, sóylesiwler arqalı sheshiwdiń isenimli tárepdarı ekenin atap ótti.
Mámleketimiz basshısı Sultanlıqtıń regionda qáwipsizlikti támiyinlew baǵdarında ámelge asırıp kiyatırǵan jedel dáldalshılıq rolin hám izbe-iz háreketlerin ayrıqsha atap ótti.
Sonday-aq, Omanda bolıp turǵan Ózbekstan puqaralarınıń qáwipsizligin támiyinlew hám olardı Watanına qaytarıw ushın jaratılıp atırǵan sharayat ushın Sultan Ullı Háziretine tereń minnetdarshılıq bildirdi.
Óz gezeginde, Oman Sultanı Ózbekstan jetekshisine awızbirshilik hám tilekleslik tuyǵıları ushın minnetdarshılıq bildirip, Masqatqa bolajaq joqarı dárejedegi tariyxıy sapar nátiyjeli ótetuǵınına isenim bildirdi.
Birlesken Arab Ámirlikleri Prezidenti Shayx Muhammad bin Zoid Ol Nahayan menen sáwbette tárepler keyingi kúnlerde Jaqın Shıǵıs regionındaǵı jaǵday barǵan sayın keskinlesip, kelispewshilikler hám qarama-qarsılıqlar háwij alıp atırǵanı ayrıqsha táshwishke salıp atırǵanın atap ótti.
Muqaddes Ramazan ayında júz berip atırǵan bunday kewilsiz jaǵdaylar xalıqaralıq huqıq principlerine qayshı ekenligi hám tınıshlıqqa qáwip tuwdırıp atırǵan hár qanday háreketlerdi jedel toqtatıw zárúr ekenligi atap ótildi.
Mámleketimiz basshısı usı qıyın waqıtlarda Ózbekstannıń strategiyalıq sherigi hám jaqın birge islesiwshisi bolǵan Birlesken Arab Ámirlikleri basshılıǵı hám xalqı menen birdey ekenin bildirdi.
Házirgi waqıtta usı mámlekette bolıp turǵan Ózbekstan puqaralarına kórsetilip atırǵan ámeliy járdem, olardı Watanına qaytarıw boyınsha alıp barılıp atırǵan ilajlar ushın ayrıqsha minnetdarshılıq bildirdi.
Óz gezeginde Ámirlikler jetekshisi usı sınawlı demlerde Ózbekstan Prezidentiniń qızǵın qollap-quwatlaǵanı, kórsetip atırǵan doslıq húrmeti hám awızbirshilik ruwxı ushın tereń minnetdarshılıq bildirdi.
Kuveyt Mámleketi Miyrasxorı Shayx Sabah al-Halid al-Hamad as-Sabah penen sóylesiw waqtında sońǵı kúnlerde Jaqın Shıǵıs regionında jaǵdaydıń keskinlesip atırǵanı, mámlekettegi hár qıylı infrastruktura obektlerine berilgen soqqılardan qatań qáweterleniw bildirildi. Bunday unamsız háreketler xalıqaralıq huqıq principlerine qayshı ekenligi hám bul sınawlı demlerde Ózbekstan dos Kuveyt xalqı menen tilekles hám iyinles ekeni atap ótildi.
Xalıqtıń tınıshlıǵı hám tatıwlıǵına úlken qáwip tuwdıratuǵın hár qanday háreketlerdi jedel toqtatıw zárúr ekenligi atap ótildi.
Pursattan paydalanıp, mámleketimiz basshısı bul jerde bolıp turǵan Ózbekstan puqaralarına kórsetilip atırǵan ámeliy járdem ushın ayrıqsha minnetdarshılıq bildirdi. Sonday-aq, Kuveyt Ámiri Mishal al-Ahmad al-Jobir as-Saboh Ullı Háziretlerine jıllı sálemlerin jolladı.
Óz gezeginde Kuveyt Miyrasxorı házirgi qıyın waqıtta bildirilgen doslıq qollap-quwatlaw hám tilekleslik tuyǵıları ushın Ózbekstan jetekshisine mámleket basshılıǵı hám xalqı atınan tereń minnetdarshılıq bildirdi.
Qatar Mámleketi Ámiri Shayx Tamim bin Hamad Ol Soniy menen sóylesiw dawamında Jaqın Shıǵıstaǵı jaǵdaydıń keskinlesiwi hám kelispewshilikler regionallıq turaqlılıq hám tınıshlıqqa úlken qáwip tuwdırıp atırǵanı atap ótildi. Muqaddes Ramazan ayında musılman úmmeti arasında kelispewshilikti kúsheytiwshi maqul bolmaǵan háreketlerden tereń qáweter bildirildi.
Mámleketlik suverenitet, tınıshlıq hám tatıwlıqqa qáwip salatuǵın hár qanday háreketlerdi jedel toqtatıw region mámleketleriniń ulıwma máplerine xızmet etetuǵını atap ótildi.
Sonday-aq, Ózbekstan jetekshisi Qatarda bolıp turǵan puqaralarımızdıń qáwipsizligin támiyinlew hám olardı Watanına qaytarıw boyınsha kórilip atırǵan ilajlar jáne jaratılǵan sharayatlar ushın Ámir Ullı Háziretine tereń minnetdarshılıq bildirdi.
Óz gezeginde Qatar Ámiri házirgi sınawlı kúnlerde Ózbekstan Prezidentine doslıq sóylesiwi, turaqlı qollap-quwatlap kiyatırǵanı, bildirgen shın júrekten tilekleslik sózleri, eki tárepleme strategiyalıq sheriklik qatnasıqların rawajlandırıwǵa qaratıp atırǵan úlken itibarı ushın ayrıqsha minnetdarshılıq bildirdi.
Baxreyn Patshası Hamad bin Iso Ol Xalifa menen sóylesiw dawamında Jaqın Shıǵısta baqlanıp atırǵan sońǵı processler, regionallıq qáwipsizlik hám turaqlılıqqa unamsız tásir kórsetip atırǵan máseleler dodalandı.
Muqaddes Ramazan ayında musılman xalqı awızbirshilik, jaqın doslıq, óz-ara húrmet hám keńpeyillik principleri tiykarında bir-birine pikirles hám járdemshi bolıwı kerek ekenligi atap ótildi.
Mámlekettiń tınıshlıǵı hám puqaralardıń qáwipsizligine úlken qáwip tuwdıratuǵın, biygúna insanlardıń jábirleniwine sebep bolıp atırǵan hár qanday háreketlerdi jedel toqtatıw, barlıq mashqalalardı tek diplomatiyalıq hám sóylesiw jolı menen sheshiw zárúr ekenligi atap ótildi.
Mámleketimiz jetekshisi bunday qıyın hám sınaqlı sharayatta Baxreyn basshılıǵı hám xalqı menen tilekles hám iyinles ekenin bildirdi.
Óz gezeginde, Patsha Hamad bin Iso Ol Xalifa mámleketimiz basshısına usınday sınawlı kúnlerde itibar kórsetip, telefon qońıraw etkeni, kórsetken shın doslıǵı hám qızǵın qollap-quwatlaǵanı ushın tereń minnetdarshılıq bildirdi.
Iordaniya Hoshimiyler Patshalıǵınıń Patshası Abdulla II ibn al-Husayn menen sóylesiw dawamında sońǵı kúnlerde Jaqın Shıǵısta baqlanıp atırǵan processlerdiń keskin tús alıp atırǵanı regionallıq qáwipsizlik, turaqlılıq hám mámleketleraralıq qatnasıqlarǵa úlken zıyan keltirip atırǵanı ayrıqsha atap ótildi.
Pútkil musılman xalqı ushın muqaddes bolǵan Ramazan ayında mámleketlerdiń suvereniteti, puqaralardıń tınıshlıǵı hám tatıwlıǵına qáwip tuwdıratuǵın hár qanday háreketlerdi jedel toqtatıw, kelispewshiliklerdi tınısh hám diplomatiyalıq jollar menen sheshiw zárúr ekenligi atap ótildi.
Mámleketimiz jetekshisi bunday sınawlı demlerde Iordaniya basshılıǵı hám xalqı menen iyinles hám tilekles ekenin atap ótti.
Óz gezeginde, Iordaniya Patshası usı sınawlı kúnlerde shın doslıq, qızǵın qollap-quwatlaw hám awızbirshilik sózleri ushın Prezidentimizge tereń minnetdarshılıq bildirdi. Jaqın keleshekte Ammanǵa bolajaq joqarı dárejedegi tariyxıy sapar joqarı dárejede hám nátiyjeli ótetuǵınına bekkem isenim bildirdi.

ÓzA