Qaraqalpaqstan Respublikası Joqarǵı Keńesi Baslıǵınıń orınbasarı R.Nurazizov sporttıń boks túri menen shuǵıllanıp atırǵan jaslar, olardıń ata-anaları hám trenerleri menen ushırasıw ótkerdi.
Onda dáslep, Radjapbay Nurazizov sońǵı jılları Ózbekstan Respublikası Prezidenti Sh.Mirziyoev basshılıǵında barlıq tarawlar qatarında denetárbiya hám sporttı rawajlandırıwǵa, jaslardı sportqa keńnen qamtıp alıwǵa, Olimpiya hám milliy sport túrlerin rawajlandırıwǵa ayrıqsha itibar qaratılıp, bul baǵdarda keń kólemli ilajlar ámelge asırılıp atırǵanlıǵın atap ótti.
Sonıń menen birge, húrmetli Prezidentimiz tárepinen Qaraqalpaqstan ushın óz aldına qabıl etilgen tariyxıy hújjetler xalqımızdıń, sonıń ishinde jaslarımızdıń turmısında úlken ózgerisler júz beriwine tiykar bolıp atırǵanlıǵın ayrıqsha tilge aldı.
Sońınan ótkerilgen ushırasıwda sportshı jaslardıń, olardıń ata-anaları hám trenerleriniń respublikamızda boksti ele de rawajlandırıw hám jaslarǵa qolaylı sharayatlar jaratıp beriw boyınsha bildirgen pikir-usınısları tıńlanıp, mashqalalar belgilep alındı hám tez waqıt ishinde olardı unamlı sheshiw boyınsha juwapkerlerge tapsırmalar berildi.
Ilaj dawamında boks boyınsha hár qıylı jarıslarda joqarı nátiyjeler kórsetip atırǵan jaslardıń ata-analarına Qaraqalpaqstan Respublikası Joqarǵı Keńesiniń Minnetdarshılıq xatları tapsırıldı.

Qaraqalpaqstan xabar agentligi