4-mart kúni Ózbekstan Respublikası Prezidenti Shavkat Mirziyoevtiń Birlesken Arab Ámirlikleri Prezidenti Shayx Muhammad bin Zoid Ol Nahayan menen telefon arqalı sóylesiwi bolıp ótti.
Tárepler sońǵı kúnlerde Jaqın Shıǵıs regionındaǵı jaǵday barǵan sayın keskinlesip, kelispewshilikler hám qarama-qarsılıqlar háwij alıp atırǵanı ayrıqsha táshwishke salıp atırǵanın atap ótti.
Muqaddes Ramazan ayında júz berip atırǵan bunday kewilsiz jaǵdaylar xalıqaralıq huqıq principlerine qayshı ekenligi hám tınıshlıqqa qáwip tuwdırıp atırǵan hár qanday háreketlerdi jedel toqtatıw zárúr ekenligi atap ótildi.
Mámleketimiz basshısı usı qıyın waqıtlarda Ózbekstannıń strategiyalıq sherigi hám jaqın birge islesiwshisi bolǵan Birlesken Arab Ámirlikleri Basshılıǵı hám xalqı menen tilekles ekenin bildirdi.
Házirgi waqıtta usı mámlekette bolıp turǵan Ózbekstan puqaralarına kórsetilip atırǵan ámeliy járdem, olardı Watanına qaytarıw boyınsha alıp barılıp atırǵan ilajlar ushın ayrıqsha minnetdarshılıq bildirdi.
Óz gezeginde, Ámirlikler jetekshisi usı sınawlı demlerde Ózbekstan Prezidentiniń qızǵın qollap-quwatlaǵanı, kórsetip atırǵan doslıq húrmeti hám awızbirshilik ruwxı ushın tereń minnetdarshılıq bildirdi.