Usı jıldıń 4-mart kúni Xalıq deputatları Taqıyatas rayonlıq Keńesiniń gezeksiz jigirma birinshi sessiyası bolıp ótti.
Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev qatnastı.
Sessiyada dáslep, Joqarǵı Keńes Baslıǵı sońǵı jıllarda Prezidentimizdiń Qaraqalpaqstanǵa bolǵan ayrıqsha itibarı menen ámelge asırılǵan keń kólemli dóretiwshilik jumıslarǵa toqtap ótti.
Bunnan soń sessiyanıń kún tártibindegi Taqıyatas rayonı hákimin tayınlaw máselesi kórip shıǵıldı.
Taqıyatas rayonı hákimi lawazımına usınılǵan talabandı rayonlıq Keńestiń bir qatar deputatları qollap-quwatlap shıǵıp sóyledi.
Sessiyada Islambek Sdikov Taqıyatas rayonı hákimi etip tayınlandı.
I.Sdikov miynet jolı dawamında Qaraqalpaqstan Respublikası Ministrler Keńesiniń Sanaattı rawajlandırıw, kapital qurılıs hám kommunikaciyalar máseleleri boyınsha sekretariatı baslıǵı, Xojeli rayonı hákiminiń finans-ekonomika hám kámbaǵallıqtı qısqartıw máseleleri boyınsha birinshi orınbasarı – ekonomikalıq rawajlanıw hám kámbaǵallıqtı qısqartıw bóliminiń baslıǵı lawazımlarında nátiyjeli jumıs alıp barǵan.
Ol usı kúnge shekem Qaraqalpaqstan Respublikası Joqarǵı Keńesiniń Sanaat qurılısı, transport hám málimleme texnologiyaları máseleleri komitetiniń baslıǵı lawazımında islep kelgen.
Sessiya májilisiniń kún tártibindegi másele boyınsha tiyisli qarar qabıl etilip, óz jumısın juwmaqladı.

Qaraqalpaqstan xabar agentligi