Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń basshılıǵında Beruniy rayonın sociallıq-ekonomikalıq jaqtan rawajlandırıw, xalıqtıń bántligin támiyinlew, mámleketlik baǵdarlamalar sheńberinde belgilengen wazıypalar, ámelge asırılıwı tiyis ilajlardıń hám aldınǵı májiliste berilgen tapsırmalardıń orınlanıwına arnalǵan májilis ótkerildi.
Májiliste dáslep, xalıqtıń qosımsha dáramat alıwına járdemlesiw, abadan turmısın támiyinlew baǵdarında húrmetli Prezidentimiz tárepinen jaratıp berilgen jeńillikler haqqında keń túrde sóz etildi. Sonday-aq, jumıssız puqaralar, sociallıq qorǵawǵa mútáj puqaralar, jaslardıń bántligin támiyinlew baǵdarında berilgen jeńillikler haqqında maǵlıwmat berildi.
Bunnan soń aldınǵı májilis dáwirinde belgilep berilgen tapsırmalardıń búgingi kúndegi orınlanıwı, máhállelerdi abat etiw, mámleketlik baǵdarlamalar sheńberinde joybarlardıń ámelge asırılıwı, jańa kárxanalardıń jumısların shólkemlestiriw, qayta tikleniwshi energiya dereklerin keńnen en jaydırıw, kámbaǵallıqtı qısqartıw, puqaralardıń turmıs dárejesin jaqsılaw baǵdarındaǵı wazıypalardıń orınlanıwı máseleleri sın kózqarastan kórip shıǵıldı.
Sonıń menen birge, puqaralardıń qosımsha dáramat alıwına járdemlesiw, jaslardıń bántligin támiyinlew, isbilermenlikti rawajlandırıw, kárxanalardıń jumıslarına jaqınnan járdem beriw hám basqa da tapsırmalardıń orınlanıwı máseleleri de dodalandı.
Májiliste óz wazıypasın orınlawda qáte-kemshiliklerge jol qoyǵan ayırım juwapkerler lawazımınan azat etildi. Bir topar basshı hám juwapkerlerge intizamıy jaza sharaların qollanıw, zárúr bolsa, lawazımına ılayıqlıǵı máselesin kórip shıǵıw boyınsha tapsırmalar berildi.

Qaraqalpaqstan xabar agentligi.