Xabarıńız bar, 2023-jıldan berli Qaraqalpaqstan Respublikasında 25-fevral jámiyetlik baslama tiykarında “Júweri gúrtik kúni” sıpatında xalqımız arasında keńnen belgilenip kelinbekte.
Álbette, bunday baslamalar ata-babalarımızdan miyras bolıp kiyatırǵan dástúrlerdi keleshek áwladlarǵa jetkeriw, milletler arasında doslıq hám óz-ara húrmetti bekkemlewde úlken áhmiyetke iye bolmaqta.
Ájiniyaz atındaǵı Nókis mámleketlik pedagogikalıq institutınıń 1-sanlı studentler turaq jayında 25-fevral – Júweri gúrtik kúni múnásibeti menen qaraqalpaq xalqınıń milliy taǵamı – júweri gúrtikti tayarlaw boyınsha tańlaw shólkemlestirildi.
Ilajǵa instituttıń tiyisli juwapkerleri qatnasıp, jaslarımız arasında usınday milliyligimizdi úgit-násiyatlawǵa úles qosıp atırǵan studentler turaq jayı jámáátine hám pedagog-tárbiyashılarına minnetdarshılıq bildirdi.
Tańlaw sheńberinde student-jaslar birgelikte milliy taǵam – júweri gúrtikti tayarlap, bayram dasturxanına tarttı. Qatnasıwshılar shólkemlestiriwshiler tárepinen xoshametlendi.

Qaraqalpaqstan xabar agentligi