Prezident Shavkat Mirziyoev “Ózbekneftgaz” akcionerlik jámiyetiniń jumıs nátiyjeliligin arttırıw boyınsha berilgen tapsırmalardıń orınlanıwı menen tanıstı.
Usı jıldıń 30-yanvar kúni bolıp ótken prezentaciyada kompaniya jumısında operaciyalıq nátiyjelilikti arttırıw hám finanslıq turaqlılıqtı támiyinlew, geologiyalıq-izlew jumısların keńeytip, uglevodorod rezervlerin kóbeytiw boyınsha bir qatar wazıypalar belgilep berilgen edi.
Búgin mámleketimiz basshısı bul baǵdardaǵı jumıslardıń barısı haqqındaǵı málimleme menen tanıstı.
Bárinen burın, kompaniya jumısında qárejetlerdi optimallastırıw boyınsha kórilip atırǵan ilajlar haqqında maǵlıwmat berildi. Sonıń ishinde, oraylıq apparatınıń shólkemlestiriwshilik strukturası qayta kórip shıǵılıp, optimallastırılmaqta. Óndirislik xızmetler, tovar hám materiallar bahaları jáne jumıstı bólip alıp islew boyınsha bahalardı qayta kórip shıǵıw, kredit portfelin tártipke salıw baslandı. Tarawǵa baylanıslı bolmaǵan aktivler basqarıwdan shıǵarılmaqta.
Sonıń menen birge, debitor qarızdarlıqtı qısqartıw boyınsha sistemalı jumıslar jolǵa qoyılǵanı atap ótildi.
Geologiya-izlew jumısların keńeytiw hám uglevodorod rezervlerin kóbeytiw boyınsha alıp barılıp atırǵan jumıslarǵa da toqtap ótildi. Sonıń ishinde, 2026-2027-jıllarda bir qatar aymaqlardaǵı jańa maydanlarda izlew jumısların kúsheytiw, 3D seysmikalıq-izlew kólemlerin keńeytiw hám qudıqlardı qurıw menen juwmaqlaw rejeleri belgilengeni aytıldı. Sonday-aq, usı jıldıń yanvar-fevral aylarında eki jańa gaz kondensat káni ashılǵanı haqqında maǵlıwmat berildi.
Kompaniyanıń strategiyalıq rawajlanıwı sheńberinde forenzikalıq audit ótkeriw, satıp alıw processlerin jetilistiriw, ESG principlerin engiziw hám esabatlardı xalıqaralıq standartlar tiykarında tayarlaw jumısları jedellestiriledi.
Mámleketimiz basshısı belgilengen wazıypalar hám rejelestirilgen barlıq ilajlardıń orınlanıwın anıq esap-sanaq, qatań tártip hám jeke juwapkershilik tiykarında támiyinlewdi dawam ettiriw boyınsha juwapkerlerge tapsırmalar berdi.

ÓzA