Ózbekstan Respublikası Prezidenti Shavkat Mirziyoev Amerika Qurama Shtatları Prezidenti Donald Tramptıń mirát etiwine bola 17-19-fevral kúnleri Tınıshlıq keńesiniń dáslepki májilisinde qatnasıw ushın ámeliy sapar menen Vashington qalasında boldı.
Mámleketimiz basshısı 19-fevral kúni Vashington qalasında Tınıshlıq keńesiniń dáslepki májilisinde qatnastı.
AQSh Prezidenti Donald Tramptıń basshılıǵında ótkerilgen ilajda Ázerbayjan, Qazaqstan, Baxreyn, Indoneziya, Argentina, Paragvay, Ruminiya, Egipet, Qatar, Pakistan, Vengriya, Albaniya, Armeniya, Vetnam, Kambodja, BAÁ, Túrkiya, Kuveyt, Saudiya Arabstanı, Izrail, Marokko hám basqa da mámleketler delegaciyalarınıń basshıları da qatnastı.
Gaza sektorın qayta tiklew hám gumanitarlıq járdem kórsetiw, sonday-aq, regionda tınıshlıq hám turaqlılıqtı támiyinlew máseleleri dodalandı.
Mámleketimiz basshısı óziniń shıǵıp sóylegen sózinde dáslepki sammitti shaqırǵanı ushın Amerika Qurama Shtatları Prezidenti, Tınıshlıq keńesiniń baslıǵı Donald Trampqa minnetdarshılıq bildirdi.
Ózbekstan Tınıshlıq keńesin dúziw boyınsha tınıshlıqtı súyiwshi baslamanı qollap-quwatlaǵanı hám onı tabıslı ámelge asırıwda ámeliy qatnasatuǵının isenimli tastıyıqlaǵanı atap ótildi.
– Keńestiń jumısı Gaza regionın ekonomikalıq hám sociallıq qayta tiklew ushın qolaylı sharayat jaratıwǵa imkaniyat beretuǵınına isenemen, – dedi Shavkat Mirziyoev.
Gazanıń hár qanday sırtqı basqarıw mexanizmi sektor xalqınıń sózsiz ishki qollap-quwatlawına súyeniwi kerek ekenligi atap ótildi.
Barlıq táreplerdiń muwapıqlastırılǵan háreketleri Gazanı tez pursatta qayta tiklew ushın zárúr sharayatlardı jaratıwǵa, kelispewshilikten keyingi processlerdi turaqlastırıwǵa xızmet etetuǵınına isenim bildirildi.
Mámleketimiz basshısı Ózbekstan bul aymaqta turaq jaylar, balalar baqshaları, mektep hám emlewxanalar qurıwǵa imkaniyatı bolǵanınsha úles qosıwǵa tayar ekenin atap ótti.
– Biziń ushırasıwımız xalıqaralıq tilekleslik, tınıshlıqtı súyiwshilik hám Jaqın Shıǵıstaǵı jaǵdaydı jaqsılawǵa bolǵan ulıwmalıq umtılısımızdıń ayqın kórinisi bolıp tabıladı. Biz Jańa Gazanı – ekonomikası abadan, xalqı ushın múnásip turmıs sharayatlarına iye bolǵan regiondı qurıw ushın bul tariyxıy imkaniyattan paydalanıwımız zárúr, – dedi Shavkat Mirziyoev.
Ilajda basqa da sırt ellerdiń mámleketlik, húkimetlik hám sırtqı siyasiy uyımlarınıń basshıları da shıǵıp sóyledi.
Májilis juwmaǵında Tınıshlıq keńesiniń jumısın qollap-quwatlaw haqqındaǵı deklaraciyaǵa qol qoyıldı.
Sonıń menen Ózbekstan Respublikası Prezidenti Shavkat Mirziyoevtiń Amerika Qurama Shtatlarına ámeliy saparı juwmaqlandı.

ÓzA