Prezidentimizdiń Ramazan ayı múnásibeti menen jollaǵan qızǵın qutlıqlawı hár bir watanlasımızdıń kewlinde ayrıqsha bir sezimdi oyattı. Bul qutlıqlaw ápiwayı bayram qutlıqlawı emes, al xalqımızdı jáne bir márte jaqsılıqqa, keńpeyillik hám shúkirshilikke shaqıratuǵın ruwxıy shaqırıq bolıp esaplanadı.
Ramazan – maǵfirat ayı. Bul ayda insan tek ǵana oraza tutpaydı, al qálbin tazalaydı, jaqsı niyetler etedi, sawaplı islerge qol uradı, ámellerin tárezige qoyadı.
Elimizde sońǵı jılları insan qádirin ulıǵlaw, sociallıq ádillikti támiyinlew mámleketlik siyasattıń tiykarǵı baǵdarına aylanǵanı biykarǵa emes. Prezidentimizdiń qutlıqlawında atap ótilgenindey, máhálle hám shańaraqlardı abat etiw, mútájlerdiń jaǵdayınan xabar alıw, kekselerge itibar qaratıw, qońsıshılıq baylanısların bekkemlew sıyaqlı jumıslar áyne Ramazan ruwxına únles bolıp esaplanadı.
Ásirese, bıyılǵı jıldıń “Máhállelerdi rawajlandırıw hám jámiyetti joqarılatıw jılı” dep járiyalanǵanı rámziy mánige iye. Sebebi, jámiyetti rawajlandırıw, bárinen burın, insandı rawajlandırıw demek. Insan bolsa mánawiyat penen, miyrim-shápáát penen, jaqsılıq penen joqarılaydı.
Ramazan kúnlerinde elimizde saqawat hám qayırqomlıq jumısları jáne de keńnen en jayıwı jańalıq emes. Bul ayda kem támiyinlengen shańaraqlarǵa járdem kórsetiw, nawqaslardıń halınan xabar alıw, meshit hám zıyarat etiw orınların abadanlastırıw jumısları jáne de jedellesedi.
Prezidentimizdiń qutlıqlawında elimizde islam mádeniyatı hám miyrasın qásterlep saqlaw, ullı oyshıllarımızdıń esteligin ulıǵlaw baǵdarında ámelge asırılıp atırǵan jumıslar ayrıqsha atap ótildi. Tashkent qalasında qurılǵan Islam civilizaciyası orayı hám Samarqandta qurılǵan Imam Buxariy kompleksi sıyaqlı kompleksler xalqımızdıń ruwxıy rawajlanıwında áhmiyetli orın iyeleydi. Bul muqaddes orınlarda ata-babalardıń ruwxına húrmet kórsetiw, olardıń ilimiy-aǵartıwshılıq miyrasın úyreniw Ramazan ayınıń ruwxına say úlken sawaplı isler bolıp esaplanadı.
Búgin dúnyanıń ayırım aymaqlarında kelispewshilikler, qarama-qarsılıqlar dawam etip atırǵan bir waqıtta, Ramazan ayı bárshemizdi tınıshlıq hám awızbirshiliktiń qádirine jetiwge shaqıradı. Miyrim-shápáát, keńpeyillik hám óz-ara húrmet insaniyattı qutqaratuǵın eń úlken kúsh bolıp esaplanadı. Jaqsılıq dúnyanı saqlaydı. Insannan bolsa jaqsı at, iygilikli ámeller qaladı.
Ramazan tek ǵana ibadat emes, al insanıylıq pazıyletlerimizdiń kórinetuǵın máwrit. Solay eken, bul múbárek ay hár birimizge keshirim, mehir hám bereket ayı sıpatında iygilikli islerimizge qanat baǵıshlasın. Sebebi, jaqsılıq dawam etetuǵın jámiyette insan qádiri de ulıǵlanadı, elimiz abat, turmısımız abadan boladı.

Mohigul QOSIMOVA,
ÓzAnıń xabarshısı