Prezident Shavkat Mirziyoev 16-fevral kúni Ramazan ayında járdemge mútáj xalıqtıń sociallıq qorǵalıwın bunnan bılay da kúsheytiw máselelerine baǵıshlanǵan májilis ótkerdi.
Mámleketimizde sońǵı jıllarda insan qádirin ulıǵlaw, xalıqtı sociallıq qorǵaw hám ádalatlı jámiyet qurıwǵa qaratılǵan keń kólemli reformalar izbe-iz ámelge asırılmaqta. Konstituciyada bekkemlep qoyılǵanınday, Ózbekstan sociallıq mámleket sıpatında puqaralardıń abadanlıǵın támiyinlew, járdemge mútáj qatlamlardı qollap-quwatlaw hám jámiyette miyrim-shápáát ortalıǵın kúsheytiwdi tiykarǵı wazıypa dep biledi. Bul principler, ásirese, Ramazan ayında jáne de ayqın kózge taslanıp, saqawat hám awızbirshilik qádiriyatları ámeliy jumıslar menen bekkemlenbekte.
Mámleketimiz basshısı múbárek ayda nuranıylar, jalǵız hám járdemge mútáj puqaralardıń halınan xabar alıw, awır jaǵdayǵa túsip qalǵan shańaraqlarǵa ámeliy járdem beriw jaqsı qádiriyat ekenin atap ótti.
Májiliste usı maqsette islep shıǵılǵan “Ramazan – miyrim-shápáát, awızbirshilik hám shúkirshilik ayı” súreni astındaǵı kompleksli ilajlar haqqında málimleme berildi. Olardı ámelge asırıw ushın “Vaqf” qayırqomlıq jámiyetlik fondına 750 milliard sum hám Sociallıq qorǵaw milliy agentligi arqalı 300 milliard sum ajıratılatuǵını belgilendi.
Ajıratılatuǵın qarjılar esabınan mútáj shańaraqlarǵa bir mártelik materiallıq járdem kórsetiw, mayıplıǵı bolǵan shaxslardıń emleniwi hám xirurgiyalıq ámeliyatlarınıń qárejetlerin qaplap beriw názerde tutılǵan.
Prezidentimiz bıyıl yanvar ayında ótkerilgen videoselektor májilisinde búgin hár qıylı radikal hám ekstremistlik ideyalar málimleme texnologiyaları arqalı jaslarımızdıń sanasın záhárlewge urınıp atırǵanı, tek ǵana jaza hám qadaǵan etiw menen bul mashqalanı sheshiwge bolmaytuǵının atap ótken edi.
Házirgi waqıtta Prezidentimiz jámiyet anaları hám keleshek áwlad tárbiyashıları bolǵan hayal-qızlardı buzǵınshı ideyalar tásirinen saqlaw, olardı hám ruwxıy, hám materiallıq qollap-quwatlaw máselesine ayrıqsha itibar qarattı.
Bul processte jat ideyalar tásirine túsip qalǵan shaxslardı sociallastırıw, materiallıq qollap-quwatlaw, olardıń shańaraqları menen individuallıq tárizde islep, medicinalıq hám psixologiyalıq járdem kórsetiw jáne kásip-ónerge úyretiw arqalı bántligin támiyinlew zárúr ekenligi kórsetip ótildi.
Prezidentimiz hár bir máhállede járdemge mútáj shańaraqlardıń anıq hám ashıq-aydın dizimin qáliplestiriw, járdemlerdi puqaralardıń dini, milleti hám sociallıq kelip shıǵıwına qaramastan, teńdey hám ádil túrde jetkeriw shárt ekenligin ayrıqsha atap ótti. Juwapker uyımlarǵa bul baǵdarda qatań qadaǵalaw ornatıw tapsırıldı.

ÓzA