Ózbekstan Respublikası Prezidenti Shavkat Mirziyoev Túrkiya Respublikası Prezidenti Rejep Tayyip Erdoǵannıń mirát etiwine bola 29-yanvar kúni rásmiy sapar menen usı mámlekette boladı.
Sapardıń baǵdarlamasına muwapıq, Ankara qalasında eki mámleket basshılarınıń basshılıǵında Strategiyalıq birge islesiw keńesiniń tórtinshi májilisin ótkeriw rejelestirilgen.
Sóylesiwlerde Ózbekstan – Túrkiya keń kólemli strategiyalıq sheriklik qatnasıqların bunnan bılay da keńeytiw máseleleri dıqqat orayında boladı.
Siyasiy sóylesiwdi rawajlandırıw, tovar almasıwdı arttırıw, tiykarǵı ekonomikalıq tarmaqlarda kooperaciya joybarların alǵa qoyıw hám transport jaǵınan óz-ara baylanıslılıqtı bekkemlewge ayrıqsha itibar qaratıladı.
Sonday-aq, jedel mádeniy-gumanitarlıq almasıwlardı dawam ettiriw máseleleri de kórip shıǵıladı. Xalıqaralıq hám regionallıq kún tártibiniń áhmiyetli tárepleri boyınsha pikir alısıladı.
Joqarı dárejedegi sóylesiwlerdiń juwmaǵında salmaqlı hújjetler toplamına qol qoyıw názerde tutılǵan.
Bunnan tısqarı, eki mámleket jetekshileri bir qatar birgeliktegi ilajlarǵa qatnasadı.

ÓzA