Tashkentte bolıp ótken Oraylıq Aziya mámleketleri hám Ázerbayjan Sawda hám investiciyalar boyınsha ministrler keńesiniń birinshi májilisinde mámleketimizdiń investiciyalar, sanaat hám sawda ministri Laziz Qudratovtıń atap ótiwinshe, bul ilaj ellerimizdiń birge islesiwin bekkemlew, ekonomikalıq sóylesiwdi rawajlandırıw jolında áhmiyetli qádem boldı.

Atap aytqanda, qatnasıwshılar óz-ara tovar almasıw kólemin 20 milliard dollarǵa jetkeriw, “Made in Central Asia” brendi astında ónim islep shıǵarıwdı jolǵa qoyıw, sanaat kooperaciyasın rawajlandırıw hám xalıqaralıq investiciya tartıw ilajların dodaladı.
Maǵlıwmatqa bola, usı jıldıń 9 ayında Ózbekstannıń region mámleketleri hám Ázerbayjan menen tovar almasıw kólemi 10 procentke artıp, 5,5 milliard dollarǵa jetken.
Tárepler transport-logistika, energetika hám sanaat tarawında sheriklikti jedellestiriw, bajıxana tártibin ápiwayılastırıw, óndiris shınjırın birlestiretuǵın sanaat xabların jaratıwǵa kelisip aldı.
Májilis juwmaǵında Birge islesiw hám investiciyalıq sheriklikti rawajlandırıw boyınsha qospa kommyunikege qol qoyıldı.

M.Pirmatova, ÓzA