Qaraózek rayonında «Medicina xızmetkerleri kúni» múnásibeti menen bayram saltanatı bolıp ótti.

Bayram ilajına rayon basshıları, medicina tarawı xızmetkerleri hám nuranıy shıpakerler qatnastı.
Bayram saltanatında rayon hákimi A. Baymuratov shıǵıp sóylep, Sońǵı Ózbekstan Respublikası Prezidenti tárepinen tarawǵa qaratılǵan keń imkaniyatlarǵa toqtap ótti hám xalıqtıń salamatlıǵın qorǵaw, densawlıqtı saqlaw tarawında salamat turmıstı qáliplestiriw sıyaqlı áhmiyetli wazıypalardı atqarıwday mashaqatlı hám maqtanıshlı kásip iyelerin búgingi kásiplik bayramı menen qutlıqladı.
Bunnan soń, bir qatar taraw basshıları menen nuranıy shıpakerler ilaj qatnasıwshıların bayram menen qızǵın qutlıqlap, ózleriniń ómir tájiriybelerin jaslarǵa aytıp berdi.
Sonday-aq, ótkerilgen ilaj dawamında tarawda kóp jıllar dawamında pidayılıq penen miynet etken tájiriybeli taraw xızmetkerlerine rayon hákimligi hám medicina birlespesi tárepinen tayarlanǵan Húrmet jarlıqlar menen estelik sawǵalar saltanatlı túrde tapsırıldı.
Bayram ilajı rayonlıq mádeniyat bólimi tárepinen tayarlanǵan koncert baǵdarlaması menen dawam etti.

Qaraqalpaqstan xabar agentligi