Dúnya jámiyetshiligi global mashqalalar fonında ulıwmalıq sheshimler izlep atırǵan bir waqıtta, Qatar paytaxtı Dohada bolıp ótken sociallıq rawajlanıw boyınsha ekinshi Pútkil jer júzilik sammiti ózine tán dodalaw maydanına aylandı. Mine, usı joqarı minberden Ózbekstan Respublikası Prezidenti Shavkat Mirziyoev tárepinen jańlaǵan baslamalar ámeliy sheshimler hám anıq háreketler baǵdarlaması sıpatında dúnya siyasatshılarınıń itibarın tarttı. Bul shıǵıp sóylew Jańa Ózbekstannıń global rawajlanıwdıń belsendi qatnasıwshısı hám hátteki, arxitektorlarınan birine aylanıw jolındaǵı isenimli qádemin kórsetedi.

Prezident shıǵıp sóylegen sóziniń tiykarın Jańa Ózbekstandaǵı eń tiykarǵı princip – “Insan qádiri ushın” ideyası quradı. Bul principtiń jańalanǵan Konstituciyamızda “sociallıq mámleket” statusı menen bekkemlengeni, sońǵı jılları elimizde kámbaǵallıq dárejesiniń 35 procentten 6,6 procentke shekem azayǵanı sıyaqlı anıq dáliller menen tiykarlanǵanı Ózbekstan usınıslarına ayrıqsha salmaq baǵıshladı. Sebebi, mámleketimiz endi dúnyaǵa tek ǵana teoriyalıq usınıslardı emes, al ózinde sınaqtan ótken hám joqarı nátiyje bergen tabıslı tájiriybeni usınbaqta. Sonlıqtan, kámbaǵallıqqa qarsı gúresiw ushın Globallıq sociallıq ádillik fondın dúziw usınısı tek ǵana jaqsı niyet emes, al anıq jumıs mexanizmine iye bolǵan, puqta oylanǵan qádem esaplanadı.
Prezident Shavkat Mirziyoev tárepinen ortaǵa taslanǵan jáne bir áhmiyetli baǵdar keleshekke qaratılǵan bolıp, bilimlendiriw hám múnásip miynet arqalı hár bir insanǵa óz potencialın júzege shıǵarıw imkaniyatın beriwden ibarat. Sawatsızlıqtıń ózi jáhán ekonomikasına jılına 1,4 trillion dollar zıyan keltirip atırǵanı faktı bilimlendiriwge kirgizilgen investiciya eń aqılǵa uǵras investiciya ekenin ayqın kórsetedi. Ózbekstannıń bul baǵdarda da óziniń ámeliy tájiriybesine súyenetuǵını itibarǵa ılayıq. Sońǵı jılları mámleketimizde joqarı bilimlendiriwge qamtıp alıwdıń keskin arttırılıp atırǵanı, jaslar hám hayal-qızlardıń bántligin támiyinlewge qaratılǵan keń kólemli baǵdarlamalar Jáhán banki sıyaqlı abıraylı shólkemler tárepinen de tán alınbaqta. Sociallıq juwapkershilik hám múnásip miynet boyınsha global baslama bolsa, mine, usı ishki reformalardıń logikalıq hám global dawamı bolıp esaplanadı.
Sóylewde sáwlelengen insanıylıq ruwxı miynet migrantlarınıń huqıqların qorǵaw máselesinde jáne de ayqın kórindi. Dúnya boylap 300 millionnan aslam adamdı qamtıp alǵan bul hádiysege biypárwa qarap bolmaydı. Ózbekstannıń xalıqaralıq forum ótkeriw hám Global baǵdarlama qabıl etiw usınısı onıń tek ǵana óz puqaraları emes, al táǵdirdiń talabı menen sırt ellerde miynet etip atırǵan barlıq insanlardıń huqıqları ushın qayǵıratuǵınınan dárek beredi. Bul, óz gezeginde, klimat ózgeriwiniń sociallıq aqıbetlerine qarsı gúresiw ideyası menen únles bolıp esaplanadı. Ózbekstannıń Aralboyı regionındaǵı apatshılıq aqıbetlerin saplastırıw hám onı ekologiyalıq innovaciyalar aymaǵına aylandırıw baǵdarındaǵı tájiriybesi bolsa eń qıyın mashqalalarǵa da dóretiwshilik hám nátiyjeli sheshim tabıw múmkin ekenliginiń ilhamlandırıwshı úlgisi bola aladı.
Doxa sammitinde jańlaǵan bul pikirler ápiwayı baslamalar toplamı emes. Bul – Jańa Ózbekstannıń jáhán saxnasındaǵı jańa ornı, jańa kelbeti hám jańa hawazı bolıp esaplanadı. Bul – ishki reformalar arqalı erisilgen ózine isenimniń sırtqı siyasattaǵı proaktiv, dóretiwshi hám adamgershilikli poziciyaǵa aylanǵanınıń ayqın kórinisi bolıp esaplanadı. Mámleketimiz basshısınıń shıǵıp sóylegen sózi dúnya jámiyetshiligin hár bir insan ushın múnásip turmıs jaratıwday iygilikli maqset jolında birlesiwge qaratılǵan qúdiretli shaqırıq bolıp esaplandı. Bul shaqırıq bolsa óz elinde úlken ózgerislerdi ámelge asırıp atırǵan mámlekettiń dúnya rawajlanıwına qosıwǵa tayar bolǵan salmaqlı úlesi bolıp esaplanadı.

ÓzA