Til – xalıqtıń ruwxıy aynası hám milliy ózlikti sáwlelendiretuǵın biybaha baylıq bolıp esaplanadı. Hár bir xalıqtıń tili – onıń tariyxıy ótmishin, ruwxıy dúnyasın hám oy-pikirin sáwlelendiredi.

1989-jıl 21-oktyabr kúni elimizde «Mámleketlik til haqqında»ǵı nızam qabıl etilip, bul áhmiyetli sáne hár jılı mámleketimizde ózbek tiline mámleketlik til biyligi berilgen kún keńnen belgilenip kelinbekte.
Usı múnásibet penen Qaraqalpaqstan medicina institutında professor-oqıtıwshılar hám studentler qatnasıwında “Ózbek tilim – maqtanıshım!” atamasında bayram keshesi bolıp ótti.
Ilajda institut rektorı O.Xalimov shıǵıp sóylep, qatnasıwshılardı búgingi bayram menen qızǵın qutlıqladı hám ózbek tiliniń jámiyetimiz turmısında tutqan ornın hám áhmiyetin atap ótti.
Haqıyqatında da 21-oktyabr – Ózbek tili bayramı kúni etip belgileniwi xalqımız turmısında umıtılmas, tariyxıy waqıyaǵa aylandı. Mámleketlik tildiń abırayı hám statusın arttırıwǵa qaratılǵan Prezidentimizdiń arnawlı párman hám qararları tiykarında respublikamızda kóplegen iygilikli isler ámelge asırılmaqta.
Kóp milletli xalqımızdı elimiz keleshegi hám gúllep-jasnawı ushın degen iygilikli maqset jolında birlestiriw, watanlaslarımızdıń qálbine birden-bir Watan, ulıwma abadan keleshek sezimin sińdiriwde til birlestiriwshi áhmiyetke iye.
Ilaj dawamında jaslarımızǵa ana tiliniń millet ruwxıylıq hám mádeniyatındaǵı ornı, onı qásterlep saqlaw hám keleshek áwladlarǵa jetkeriw zárúrligi haqqında ibratlı pikirler bildirildi.
Bayram keshesinde studentler tárepinen ana-Watan, tuwılǵan jer hám milliy qádiriyatlardı jırlawshı qosıqlar hám saxnalıq kórinisler qoyıp berilip, bul ilaj qatnasıwshılarına ózgeshe zawıq baǵıshladı.
Ótkerilgen bul saltanatlı keshe tek ǵana ózbek tili bayramı emes, al milliy qádiriyatlarımız, mádeniyatımız hám ózligimizdi ulıǵlaytuǵın ruwxıy keshe boldı desek qátelespeymiz.

Qaraqalpaqstan xabar agentligi