Shımbay rayonı prokuraturası tárepinen jaslardı qollap-quwatlawǵa qaratılǵan ilajlar turaqlı shólkemlestirilip kelinbekte. Bunnan maqset, atalıqqa alınǵan jaslardıń usınıs hám mashqalaların tıńlaw, olardı qıynap kiyatırǵan sociallıq-ekonomikalıq máselelerdi sheshiwden ibarat.

Rayon prokurorı R.Xalmuratovtıń gezektegi úyreniwlerinde Taǵjap APJda jasawshı E.Qayratdinovtıń turaq jayı ońlawǵa mútáj jaǵdayda ekenligi anıqlanǵan edi.
Búgin bolsa turaq jaydı ońlaw ushın qurılıs materiallarınıń jetkerip beriliwi támiyinlendi.
Bunnan tısqarı, Konshi MPJda jasawshı J.Shakirovqa isbilermenlik jumısın jolǵa qoyıwǵa járdem berildi.
Búgingi kúnge shekem, rayon prokurorına biriktirilgen 10 jastıń 9ında anıqlanǵan sociallıq-ekonomikalıq mashqalalarına unamlı sheshimler tabıldı. Yaǵnıy, 6 jas turaqlı jumıs penen támiyinlenip, 3 jasqa jeńilletilgen kreditler ajıratılıwına járdem berildi. 5 adamnıń aydawshılıq gúwalıǵı hám pasport penen baylanıslı mashqalaları sheshildi.
Rayon jasların qollap-quwatlawǵa qaratılǵan ilajlar dawam etpekte.

Qaraqalpaqstan xabar agentligi