Ózbekstan Respublikası Prezidenti Shavkat Mirziyoev rásmiy sapar menen elimizde bolıp turǵan Yaponiya sırtqı isler ministri Takesi Ivaya basshılıǵındaǵı delegaciyanı qabılladı.

Joqarı mártebeli miyman mámleketimiz basshısına Yaponiya Bas ministri Sigeru Isibanıń qızǵın sálemi hám Ózbekstannıń Ǵárezsizlik kúni múnásibeti menen qutlıqlawın jetkerdi.
Ushırasıwda Ózbekstan – Yaponiya strategiyalıq sheriklik qatnasıqların jáne de bekkemlew hám kóp táreplemeli birge islesiwdi keńeytiw máseleleri dodalandı.
Jedel sóylesiwler dawam etip atırǵanı hám ámeliy birge islesiw jedel rawajlanıp atırǵanı ayrıqsha qanaatlanıwshılıq penen atap ótildi. Búgin ótkerilgen eki mámleket sırtqı isler ministrleri Strategiyalıq sóylesiwiniń birinshi májilisiniń paydalı nátiyjeleri joqarı bahalandı.
Tovar almasıw kólemi artpaqta, Yaponiyanıń jetekshi kompaniyalarınıń qatnasıwında iri investiciyalıq joybarlar ámelge asırılmaqta. 17-avgust kúni Osaka qalasında Pútkil jer júzilik “EXPO 2025” kórgizbesi sheńberinde bolıp ótken Ózbekstan Milliy kúni tabıslı ótkerildi.
Siyasiy sóylesiwdi tereńlestiriw, sawda-ekonomikalıq, investiciyalıq, finanslıq-texnikalıq hám mádeniy-gumanitarlıq birge islesiwdiń anıq joybarların alǵa qoyıwǵa ayrıqsha itibar qaratıldı.
Ózbekstan – Yaponiya orayınıń jumısın keńeytiw hám keleshekte onıń tiykarında Yaponiyanıń jetekshi universitetleriniń qatnasıwında birgeliktegi universitet shólkemlestiriw rejeleri qollap-quwatlandı.
Xalıqaralıq hám regionallıq áhmiyetke iye máseleler, sonıń ishinde, “Oraylıq Aziya + Yaponiya” formatındaǵı bolajaq sammitti ótkeriw boyınsha da pikir alısıldı.

ÓzA