“Avaza” milliy turizm zonasında Ózbekstan Respublikası Prezidenti Shavkat Mirziyoev, Túrkmen xalqınıń milliy jetekshisi, Xalıq Másláháti Baslıǵı Gurbanguli Berdimuhamedov hám Ázerbayjan Respublikası Prezidenti Ilham Alievtiń úsh tárepleme ushırasıwı bolıp ótti.

Sawda-ekonomikalıq, transport-kommunikaciya, energetika hám gumanitarlıq tarawlardaǵı kóp táreplemeli birge islesiwdi rawajlandırıw máseleleri kórip shıǵıldı.
Mámleketimiz basshısı sóziniń aldında Gurbanguli Berdimuhamedovtı avgust ayınıń basında BMShtıń Teńizge shıǵıw imkaniyatı bolmaǵan rawajlanıp atırǵan mámleketler boyınsha úshinshi konferenciyası tabıslı ótkerilgeni menen jáne bir márte qızǵın qutlıqladı.
Ózbekstan Prezidenti Ázerbayjan jetekshisi Ilham Alievti jaqında Vashington qalasında Armeniya menen tınıshlıq deklaraciyasına qol qoyılǵanı menen de qızǵın qutlıqladı.
Mámleketimiz basshısı kóp táreplemeli birge islesiwdi keńeytiw boyınsha bir qatar anıq usınıslardı bildirdi.
Úsh mámlekettiń úlken tranzit potencialın tolıq iske qosıw áhmiyetli ekenligi atap ótildi.
Ámeldegi hám perspektivalı koridorlardıń tutasıwı Qıtaydı mámleketlerimiz aymaqları arqalı Qubla Aziya, Jaqın Shıǵıs hám Evropa menen baylanıstıratuǵın turaqlı hám nátiyjeli transkontinentallıq jónelisti qáliplestiriw imkaniyatın beretuǵınına isenim bildirildi.
Búgingi kúnde Qıtay-Ózbekstan temir jolınıń qurılısı baslanǵan. Bunnan tısqarı, jaqında Pakistan hám Awǵanstan menen Transawǵan koridorın qurıw joybarı boyınsha memorandumǵa qol qoyıldı.
Jańa júk aǵımları, bárinen burın, Ázerbayjan, Túrkmenstan hám Ózbekstan infrastrukturasınan nátiyjeli paydalanıwdı támiyinleytuǵını atap ótildi.
Orta marshruttı, sonıń ishinde, Zangezur koridorın rawajlandırıw baǵdarındaǵı rejeler de qollap-quwatlandı.
Eń áhmiyetli máselelerdi ekspertler dárejesinde birgelikte islep shıǵıwǵa kirisiw usınıs etildi.
Bul – ótkeriwsheńlik qábiletin keńeytiw, sonıń ishinde, Túrkmenbashı hám Baku portlarında zamanagóy logistika infrastrukturasın jaratıw, kelisilgen tarif siyasatın júrgiziw, tártip-qaǵıydalardı sanlastırıw hám júkler qadaǵalawın támiyinlew máseleleri bolıp esaplanadı.
Ózbekstan tiykarǵı bazarlarǵa biznes ushın eń qısqa hám paydalı shıǵıwdı támiyinlew maqsetinde júk tasıw tariflerin óz-ara tiykarda azaytıwǵa tayar ekeni bildirildi.
Bunnan tısqarı, háreketlerdi birlestiriw logistika infrastrukturasın rawajlandırıwda qatnasıwı múmkin bolǵan donor mámleketler hám xalıqaralıq shólkemler menen pragmatikalıq birge islesiwdi jolǵa qoyıw imkaniyatın beretuǵını atap ótildi.
Sonıń menen birge, Ózbekstan Kaspiy teńizi arqalı júklerdi tasıw ushın óziniń parom quwatlıqların jaratıwdan mápdar ekeni bildirildi.
Energetika qáwipsizligin támiyinlew maqsetinde kooperaciyanı tereńlestiriw hám energiya resursların úshinshi mámleketlerge eksport etiw jolların rawajlandırıw zárúr ekenligi atap ótildi.
Bul baǵdarda Evropaǵa “jasıl” energiya jetkerip beriwdi shólkemlestiriw joybarı perspektivalı ekeni atap ótildi.
Dástúriy uglevodorodlar baǵdarında Kaspiy shelfinde geologiyalıq-izlew jumısların alıp barıw hám kánlerdi ózlestiriw tarawında birge islesiw perspektivaların úyreniw usınıs etildi.
Tovar almasıwdı hám sanaat kooperaciyası kólemin túp-tiykarınan arttırıw jáne bir tiykarǵı baǵdar sıpatında atap ótildi. Atap ótilgenindey, sońǵı jılları Ózbekstannıń Túrkmenstan hám Ázerbayjan menen óz-ara sawda kólemi 2 esege arttı. Tovar almasıw quramında sanaat ónimleriniń úlesi 40 procentke jetti.
Turaqlı sawda-logistika shınjırların rawajlandırıw, kótere sawda-bólistiriw orayların shólkemlestiriw hám iri sawda tarmaqlarına shıǵıw, fitosanitariya hám karantin talapların unifikaciyalaw, ónimlerdi sanlı markirovkalawdı engiziw, birgeliktegi elektron platformalardı iske qosıw hám tovar-shiyki zat birjaları kooperaciyasın keńeytiwdi názerde tutatuǵın kompleksli háreketler rejesin birgelikte tayarlaw usınıs etildi.
Sawda-sanaat palatalarınıń qáwenderliginde kórgizbe-yarmarka ilajları hám isbilermenlik ushırasıwların ótkeriw arqalı úsh mámleket aymaqların bul processlerge jedel tartıw usınıs etildi.
Gumanitarlıq baylanıslardı keńeytiw sheńberinde mámleketlerimiz hám úshinshi mámleketlerden turistlerdiń aǵımın kóbeytiw, xalıqlarımızdıń bay mádeniy miyrasınıń uqsaslıǵın, dástúr hám úrp-ádetleriniń jaqınlıǵın kórsetiw imkaniyatın beretuǵın turizm hám mádeniy almasıwlardıń úsh tárepleme baǵdarlamasın qabıl etiw usınıs etildi.
Juwmaǵında mámleketimiz basshısı alǵa qoyılǵan baslamalar hám erisilgen kelisimlerdi ámelge asırıw ushın “jol kartası”n tayarlaw, sonday-aq, tiykarǵı baǵdarlar boyınsha ministrlerdiń birgeliktegi ushırasıwları mexanizmin iske qosıwdı usınıs etti.

ÓzA