Usı jıl 18-iyun kúni Rossiya Prezidenti Vladimir Putin Sankt-Peterburg xalıqaralıq ekonomikalıq forumı (PMEF) sheńberinde, dástúrge bola, dúnyanıń jetekshi málimleme agentlikleriniń basshıları menen ushırasıw ótkerdi.

«Rossiya málimleme-telegraf agentligi (ITAR-TASS)» Federal mámleketlik unitar kárxanası járdeminde bıyıl toǵızınshı márte shólkemlestirilgen, eki saatqa shamalas dawam etken usı sóylesiwde “Reuters”, “Deutsche Press Agentur”, EFE, “Sinxua”, “Associated Press”, “Anadolu”, “France Press” sıyaqlı belgili media birlespeleriniń basshıları qatarında Ózbekstan Milliy málimleme agentligi – ÓzA bas direktorı, senator Abdusaid Kwchimov ta qatnastı.
Kútilgenindey, jetekshi sırt mámleketler ǴXQ wákilleriniń qatnasıwında ótken sóylesiwde Rossiya-Ukraina kelispewshiligi, NATOnıń búgingi háreketleri, Jaqın Shıǵıs kelispewshiligi, ásirese Iran –Izrail kelispewshiligi, AQShtıń dúnya siyasatına tásiri sıyaqlı áhmiyetli temalar tilge alınǵan.
Atap aytqanda, ÓzA basshısı Putinge múrájat eter eken, keyingi waqıtta xalıqaralıq jámiyetshilik dodalawınan túspey atırǵan másele – RF húkimeti alıp barıp atırǵan migraciya siyasatın jetilistiriwge qaratılǵan ilajlar sebepli júzege kelgen ayırım kelispewshiliklerge itibar qarattı.
RF jetekshisi bul sorawǵa juwap berer eken, haqıyqattan migrantlar menen baylanıslı, sociallıq ózgeshelikke iye yamasa miynet bazarına baylanıslı ayırım bir mashqalalar bar ekenligin biykar etpegen halda, áyne, «Ózbekstan Prezidenti Shavkat Miromonovich penen bul máselede birgelikte jumıs alıp barılıp atırǵanı, mashqalalar, álbette, saplastırılatuǵını»n atap ótti.
Abdusaid Kwchimov Vladimir Putin menen sóylesiw dawamında bul áhmiyetli másele boyınsha belgili bir usınıslardı da alǵa qoydı. Máselen, eki mámleket jaslarınıń turaqlı ulıwma keleshegin qurıw ushın keń kólemli, uzaq múddetke mólsherlengen arnawlı baǵdarlamalar islep shıǵıw hám iske túsiriw zárúr ekenligin bildirdi.
Óz gezeginde, Rossiya basshısı mámleketimiz wákiliniń pikirin tolıq maqullap, bul baǵdarda izbe-iz jumıs alıp barılıwı, máselen RFda islew tileginde bolǵan jaslardı ayrıqsha tayarlaw sistemasın jaratıw názerde tutılǵanına áhmiyet qarattı. V.Putin usı jerde Ózbekstan Prezidentiniń járdemshisi Saida Mirziyoevanıń jaqında Moskvaǵa ámelge asırǵan saparına da toqtap ótti.
Usı sapar waqtında, RF Húkimeti hám Prezident Administraciyasınıń juwapkerleri menen ushırasıwlar dawamında mámleketimiz basshısınıń tapsırmasına bola jaslar arasındaǵı qatnasıqlardı rawajlandırıw, áyne, baǵdardı jedel alǵa qoyıwǵa áhmiyetli itibar qaratılǵan.

ÓzA