Oliy Majlis Senatı Baslıǵı Tanzila Norboeva BMShtıń Narkotikler hám jınayatshılıq boyınsha basqarmasınıń (BMSh NJB) Awǵanstan, Oraylıq Aziya, Pakistan hám Irandaǵı regionallıq wákili Oliver Shtolpe menen ushırasıw ótkerdi.

Onda Ózbekstanda Prezident Shavkat Mirziyoevtiń basshılıǵında ámelge asırılıp atırǵan keń kólemli reformalar joqarı bahalanıp, bul processlerde BMSh NJB mámlekette ámelge asırılıp atırǵan jumıslardı tolıq qollap-quwatlaytuǵının hám hár tárepleme járdem beriwge tayar ekenligin bildirdi.
Atap ótilgenindey, Ózbekstanda korrupciyaǵa hám adam sawdasına qarsı gúresiw máseleleri mámleketlik siyasat dárejesine kóterilgen. Bul baǵdarda BMSh NJB tárepinen úlken járdem kórsetilip atırǵanı, sonday-aq, Basqarmanıń korrupciya, náshebentlik zatlardıń nızamsız aylanısı hám adam sawdasına qarsı gúresiw baǵdarındaǵı tájiriybesi xalıqaralıq standartlardı esapqa alǵan halda milliy mexanizmlerdiń nátiyjeliligin jáne de arttırıwǵa xızmet etetuǵınına isenim bildirildi.
Sóylesiw waqtında korrupciya hám adam sawdasına qarsı gúresiwde parlamenttiń roline itibar qaratılıp, bul óz ornında xalıqaralıq kólemde tán alınǵan bekkem nızamshılıq sistemasın qáliplestiriwge xızmet etip atırǵanı atap ótildi. Sonıń menen birge, Ózbekstannıń bul baǵdardaǵı tájiriybesi xalıqaralıq dárejede úlgi bolıwı múmkin ekenligi atap ótildi.
Ózbekstannıń adam sawdasına hám májbúriy miynetke qarsı gúresiw, oǵan baylanıslı jınayatlardı anıqlaw hám ayıpkerlerdi juwapkershilikke tartıw isleri sezilerli dárejede jaqsılanǵanlıǵı, miynet migrantlarınıń huqıqların qorǵaw baǵdarındaǵı jetiskenlikleri atap ótildi. Bul mámlekettiń xalıqaralıq reytinglerdegi ornı jaqsılanıwında óz kórinisin tawıp atırǵanı atap ótildi.
Tárepler jınayatshılıqtıń aldın alıwda zamanagóy málimleme texnologiyaların qollanıw tarawındaǵı birge islesiwdi jedellestiriwge, sonday-aq, global tallawlar – sanlastırıw, miynet migraciyasınıń keńeyiwi hám basqa tiykarǵı baǵdarlardı esapqa alǵan halda 2026-2030-jıllarǵa mólsherlengen birge islesiwdiń jańa «jol kartası»n tayarlawǵa kelisip aldı.

Qaraqalpaqstan xabar agentligi