2025-jıl 15-may kúni Prezident Shavkat Mirziyoevtiń basshılıǵında mektep bilimlendiriwi sistemasındaǵı reformalardıń nátiyjeliligin jáne de arttırıw hám keleshektegi tiykarǵı wazıypalar boyınsha videoselektor májilisi bolıp ótken edi.

Májiliste jaslardıń bos waqtın nátiyjeli shólkemlestiriw máseleleri de kórip shıǵılıp, búgingi kúni «Bárkamal áwlad» mekteplerine 350 mıń balanıń qamtıp alınǵanlıǵı atap ótildi.
Endi «Bárkamal áwlad» mektepleri, «Yoshlik» sport jámiyeti hám Oqıwshı jaslar orayı birden-bir sistemaǵa birlestiriletuǵını belgilendi hám bul oraylar tolıq ońlanıp, zamanagóy, kreativ baǵdarlar tiykarında úskeneleniwi, olarda shet tillerin oqıtıw, jasalma intellekt, programmalastırıw hám animaciya sıyaqlı jańa zamanagóy dógerekler ashılatuǵını atap ótildi.
Sonday-aq, májiliste oqıwshılar arasında turizmdi rawajlandırıw boyınsha da jańa sistema jaratılatuǵını hám Qaraqalpaqstan, Xorezm, Samarqand, Buxara hám paytaxttaǵı «Bárkamal áwlad» mekteplerinde keminde 100 orınlıq «Balalar turistlik bazası» shólkemlestiriletuǵını kórsetilip ótildi. Juwapkerlerge qızıqlı turizm toplamların islep shıǵılıp hár jılı 1 million oqıwshını Ózbekstan boylap sayaxatqa tartıw wazıypası júklendi.
«Bárkamal áwlad» balalar mektepleri jazǵı dem alıs kúnlerinde jaslardıń bos waqtın mazmunlı shólkemlestiriw boyınsha «Jaz-2025» koncepciyası hám «Áhmiyetli 90 kúnlik reje» islep shıǵıldı.
Usı áhmiyetli 90 kúnlik sheńberinde Qaraqalpaqstan Respublikası «Bárkamal áwlad» balalar mektebi tárepinen ǵalaba xabar quralları xızmetkerleri ushın Qońırat rayonı «Bárkamal áwlad» balalar mektebine press-tur shólkemlestirildi.
Onda jurnalistler «Bárkamal áwlad» balalar mektebinde oqıwshı-jaslardıń bos waqıtların mazmunlı shólkemlestiriw ushın ashılǵan hár qıylı dógereklerdiń jumısları menen jaqınnan tanısıp, dógerek basshıları hám mektep tárbiyalanıwshıları menen jaqınnan sáwbetlesti.
-Mektebimizde jeti baǵdar boyınsha yaǵnıy, «Ónermentshilik hám qol óneri», «Texnikalıq konstruktorlıq hám modellestiriw», «Turizm hám ekologiya», «Shet tiller», «Denetárbiyası hám sport», «Mádeniyat hám kórkem óner», «Joqarı bilimlendiriw mákemeleri hám mektepke tayarlaw» baǵdarlarında 75 dógerek bolıp, olarǵa 2520 oqıwshı qamtıp alınǵan,-deydi mektep direktorı Munira Matmuratova.- Sonnan tarmaq dógereklerindegi 22 ulıwma orta bilim beriw mekteplerinde 1650 oqıwshı bilim almaqta. Mektebimizdiń materiallıq-texnikalıq bazasın bekkemlew maqsetinde, 2022-jılı Ashıq byudjetten 500 mln sum qarjı utıp alıp, bul qarjıǵa zamanagóy kompyuter, tigiw hám kesteshilik mashinaların, elektron taxta hám basqa kerekli úskenlerdi satıp aldıq. Al, ótken jılı bolsa, Ashıq byudjetten 1 360 000 000 sum qarjı utıp alıp, oǵan qolı gúl qurılısshılar tárepinen 12×24 óleshmindegi koncert zalı qurıp berildi. Bunday qolaylılıqlardan nátiyjeli paydalanıp kiyatırǵan oqıwshılarımız hár qıylı tańlawlarǵa qatnasıp, jeńimpazlıqtı qolǵa kirgizbekte. Atap aytqanda, 2024-jıl 26-aprel kúni «Bárkamal áwlad balaları» festivalınıń Respublikalıq basqıshında «Denetárbiya hám sport» baǵdarı boyınsha shaxmat dógeregi aǵzası M.Majitov sıylı ekinshi orındı iyelegen bolsa, 2024-jıldıń 10-11-may kúnleri Rossiyanıń Sankt-Peterburg qalasında ótkerilgen Robototexnika boyınsha «Detalka 2024» jarısında mektebimizdiń robototexnika jámááti sıylı 1-orındı iyelewge eristi. Robototexnika dógeregi aǵzası Uluǵbek Amangeldiev 2024-jıl 19-sentyabr kúni Nókis qalasında Respublikalıq «Bárkamal áwlad» balalar mektebinde ótkerilgen «Jas oylap tabıwshı» tańlawında qatnasıp, sıylı 2-orındı iyelegen bolsa, kesteshilik dógereginiń aǵzası Sevara Adiljanova «Language learning» tańlawınıń Qaraqalpaqstan Respublikası basqıshında 1-orındı iyelep, tańlawdıń Ándijan qalasında bolıp ótken Ózbekstan Respublikası basqıshına qatnasıp, arnawlı Diplom menen sıylıqlandı.
Sol jıldıń 3-noyabr kúni Qaraqalpaqstan Respublikası kóleminde «SIRIUS» oqıw orayı hám Nókis áskeriy garnizonı menen birgelikte ótkerilgen Mental arifmetika boyınsha ashıq olimpiadada mektebimiz Mental arifmetika dógeregi aǵzaları qatnasıp, onda Jasmina Saparbaeva joqarı orındı iyelep, jollama arqalı Qazaqstan, Qırǵızstan, Birlesken Arab Ámirlikleri hám Túrkiyada bolıp ótetuǵın olimpiadalarda qatnasıw imkaniyatın qolǵa kirgizdi.
20-dekabr kúni Qaraqalpaqstan Respublikası Mektepke shekemgi hám mektep bilimlendiriwi ministrligi janındaǵı Respublikalıq «Bárkamal áwlad» balalar mektebi tárepinen «Biz talant iyelerimiz» kibersport jarısı ótkerildi.
Jarısqa 10 jastan 16 jasqa shekemgi oqıwshı jaslar komandalıq túrde qatnastı hám mektebimizdiń «Qońırat» komandası 3-orındı iyeledi.
Usılar menen bir qatarda, Qaraqalpaqstan Respublikası Bárkamal áwlad balalar mektebi hám Qaraqalpaqstan Respublikası Ayrıqsha jaǵdaylar basqarması menen birgelikte ótkerilgen «Biz órtke qarsımız!» tańlawınıń Respublikalıq basqıshında mektebimizdiń «Jas ekolog hám tábiyattanıwshı» dógeregi aǵzası Damir Nietbaev «Eń jaqsı órt qáwipsizligine baylanıslı skanvord (krossvord)» baǵdarı boyınsha 2-orındı iyelep, diplom jáne bahalı sawǵalar menen sıylıqlandı.
Al, 22-dekabr kúni Tashkent qalasında bolıp ótken «Istedodli yulduzlar» respublikalıq tańlawına mektebimiz «Estrada vokal» hám duwtar dógeregi basshıları Gamzat Ikmetov hám Allabergen Alimbaev qatnasıp, 1-orındı iyelegen bolsa, 2025-jıldıń mart ayında Tashkent qalasında bolıp ótken “European Stars” xalıqaralıq tańlawında mektebimizdiń dógerek basshısı Gamzat Ikmetov sıylı 3-orındı jeńip aldı.
Ótkerilgen ilaj dawamında Qońırat rayonı “Bárkamal áwlad” balalar mektebinde «Texnika konstruktorlıq hám modellestiriw» baǵdarındaǵı dógerek aǵzaları arasında «Robotlar urısı» tańlawınıń Qaraqalpaqstan Respublikalıq basqıshı ótkerilip, tańlaw juwmaǵında jeńimpazlar arnawlı diplomlar menen sıylıqlandı hám tańlawdıń finallıq basqıshına jollamanı qolǵa kirgizdi. Tańlawǵa aymaqlardan háwesker dógerek aǵzaları óz robotları menen qatnaspaqta.
-Tańlawdı ótkeriwden tiykarǵı maqset, oqıwshılardıń bos waqıtların mazmunlı shólkemlestiriw, zamanagóy málimleme-kommunikaciya texnologiyalarına bolǵan kónlikpelerin qáliplestiriw, olarǵa kásipke baǵdarlawǵa baylanıslı bilim hám kónlikpelerdi sińdiriw, robototexnika tarawında jańa qollanba hám qurılmalardı engiziw, oqıwshılar arasınan qábiletli balalardı anıqlaw, olardı qollap-quwatlaw, oqıwshı-jaslardıń sociallıq belsendiligin jáne de arttırıw, innovaciyalıq menedjment, marketing hám IT texnologiyalarınan paydalanǵan halda zamanlasları menen óz-ara tájiriybe almasıwdı shólkemlestiriwden ibarat,-deydi Qaraqalpaqstan Respublikası «Bárkamal áwlad» balalar mektebi direktorınıń orınbasarı Dilfuza Kazakova.
Ótkerilgen press-tur jurnalistler ushın oǵada tásirli ótip, olar ózleriniń qızıqtırǵan sorawlarına juwap aldı.

Adilbay Orazov,
Qaraqalpaqstan xabar agentligi sholıwshısı.