Házirgi kúnlerde Oliy Majlis Nızamshılıq palatası deputatları óz okruglerindegi xalıq penen pikirlesiw, olardıń pikir-usınısların, mashqalaların tıńlaw maqsetinde orınlarda úyreniw jumısların alıp barmaqta. Nızamshılıq palatasınıń deputatı Gúljan Xalmuratova da ózi saylanǵan aymaq Shomanay rayonında bolıp, bir qatar sociallıq taraw obektleri hám isbilermenlik subektiniń jumısı menen jaqınnan tanıstı.
Xalıq wákili dáslep sociallıq taraw obektlerinen biri Shomanay rayonı medicina birlespesine qaraslı kóp tarmaqlı oraylıq poliklinikasında bolıp, ol jerdegi poliklinikanıń xalıqqa sapalı medicinalıq xızmet kórsetiwi, kóriniwge kelgen nawqaslar ushın jaratılǵan sharayatlar, medicinalıq ásbap-úskeneler menen támiyinleniwi sıyaqlı máseleler boyınsha medicina tarawı wákilleri menen pikirlesti, olardıń pikir -usınısların, mashqalaların úyrendi. Bul oraylıq poliklinikanıń qurılıs jumısları óz juwmaǵına jetken, paydalanıw aldında tur.

Maǵlıwmat ornında, bul oraylıq poliklinika “Monshaqlı” mákan puqaralar jıyınında jaylasqan bolıp, 15 mıńnan aslam xalıqqa xızmet kórsetip kelmekte. Shomanay rayonı kóp tarmaqlı oraylıq poliklinikasında jeti medicinalıq brigada xalıqqa sapalı xızmet kórsetip kelmekte.
Medicina tarawı wákilleri menen sóylesiw waqtında kóp tarmaqlı oraylıq poliklinikasınıń imaratı kóp waqıttan berli mashqala bolıp kiyatırǵan edi. Mámleketimiz basshısınıń baslaması menen mámleketlik qarjı esabınan 9,5 milliard sumǵa jańa zamanagóy kóp tarmaqlı oraylıq poliklinika boy tikledi. Kóp tarmaqlı oraylıq poliklinikada joqarı kategoriyalı 50 ge shamalas shıpakerler, 120 ǵa shamalas miyirbiykeler jumıs alıp barmaqta. Jańadan qurılǵan kóp tarmaqlı oraylıq poliklinikanıń tolıǵı menen lokal tarmaǵı jaylastırılǵan.
Deputat G. Xalmuratova jergilikli Keńes deputatları hám medicina tarawınıń wákilleri menen ashıqtan-ashıq sóylesiw dawamında elimizde keyingi jılları densawlıqtı saqlaw tarawına úlken itibar qaratılıp atırǵanı, hár bir insan ushın birinshi gezekte eń úlken baylıq bul onıń salamatlıǵı ekenin turmıslıq mısallar menen túsindirip ótti.
Sóylesiw dawamında medicina tarawınıń wákilleri de medicina tarawına baylanıslı ózleriniń pikir-usınısları hám mashqalaları menen ortaqlastı.
Xalıq wákiliniń gezektegi mánzili rayondaǵı iri isbilermenlik subektlerinen biri “Shomanay Ekoteks” tekstil kárxanası boldı. Ol usı kárxananıń jumısı menen jaqınnan tanıstı. Xalıq wákili ol jerde isbilermenler ushın jaratılǵan sharayatlar, islep shıǵarılıp atırǵan ónimniń sapası, ótimliligi, eksport potencialı da úyrenildi.
Maǵlıwmat ornında “Shomanay Ekoteks” juwapkershiligi sheklengen jámiyeti 2020-jıldıń mart ayında tolıq quwatlılıqta iske túsirilgen bolıp, 480 jumısshı 3 smenada jumıs alıp baradı. Kárxanada paxtadan iyirilgen jip islep shıǵarıw jolǵa qoyılǵan bolıp, jıllıq quwatlılıǵı 7300 tonnanı quraydı.
Sóylesiw dawamında deputat rayonnıń sociallıq-ekonomikalıq jaqtan rawajlanıwında iri kárxanalardıń iske qosılıwı xalıqtıń bántligin támiyinlew menen birge xalqımızdıń abadanlıǵın támiyinlewge xızmet etetuǵının atap ótti.
Xalıq wákiliniń ushırasıwları orınlarda dawam etpekte.

Qaraqalpaqstan xabar agentligi