Assalawma aleykum, áziz watanlaslar!

Húrmetli veteranlar, qádirli jaslar!

Gózzal apa-qarındaslar, húrmetli miymanlar!

Siz, ázizlerdi, kóp milletli pútkil xalqımızdı eski hám bárqulla náwqıran bayram – Nawrız bayramı menen shın júrekten qızǵın qutlıqlayman.
Búgingi jaqtı kúndi el-jurtımız benen tınısh kútip alıp atırǵanımız ushın Jaratqanǵa sheksiz shúkirler aytamız.
Bıyılǵı Nawrız muqqades Ramazan ayında, onıń teberik pazıyletlerine únles halda ótip atırǵanı bayramǵa ayrıqsha ruwx, ózgeshe payız hám quwanısh baǵıshlamaqta.
Kewillerimiz shadlıqqa tolǵan usınday bereketli kúnlerde elimizdiń musılmanların, pútkil islam úmmetin Ramazan bayramı menen jáne bir márte qutlıqlap, ulıwma pák niyetlerimiz qabıl bolıwın tileymiz.
Sırt mámleketlerde ana jurt mehri hám saǵınıshı menen jasap atırǵan watanlaslarımızdı da shın júrekten qutlıqlap, qızǵın tileklerimizdi bildiremiz.
Usınday quwanıshlı hám ullı kúnler bárshemizge qutlı bolsın!
Qádirli doslar!
Nawrız bayramı 3 mıń jıllıq mámleketshiligimiz tariyxında óziniń biytákirar mánawiy áhmiyeti menen bárqulla ayrıqsha itibarǵa iye ullı bayram bolıp esaplanadı.
Usı biybaha áyyyam haqqında jazılǵan ilimiy-tariyxıy hám kórkem shıǵarmalar sonshelli kóp, olar xaqılı túrde milliy miyrasımızdıń máńgilik dúrdanalarına aylanǵan.
Xalqımız ásirler dawamında awır hám mashaqatlı, sınaqlı waqıtlarda da bul bayramdı ullı tábiyatı hám qádiriyatları menen qásterlep-saqlap kelgeni tańqalarlıq káramat bolıp esaplanadı
Nawrızdıń biytákirar gózzalıǵı, insaniylıq ruwxı hám tereń filosofiyası globbalasıw dáwirinde de pútkil adamzattı hayran qaldırıp atırǵanı onıń ázeliy mazmunı hám ómirsheń kúshinen dárek beredi.
Ásirese, insannıń tábiyat hám jaratılıs penen úylesligi, jaratıwshańlıq qushtarlıǵı, ǵayrat hám intası, óz-ara awızbirshilik, miyrim-shápáát hám saqawat sıyaqlı ullı pazıyletleri Nawrız tımsalında jáne de jarqın kórinedi.
Nawrız kúnlerinde baba diyqanlarımız ırısqımız, dasturxanımızdıń qut-bereketin oylap, ana jerge óz mehrin beredi, mol zúráát alıw niyetinde bekkem bel baylaydı.
Usı mániste, Mir Áliysher Nawayı babamızdıń «Diyqan, dán shashar, jerdi súrip ırısqı jolın ashar» degen sózlerinde tereń turmıslıq máni jámlesken.
Kewilimizde miynet hám dóretiwshilik, oyanıw hám jasarıw zawqı barǵan sayın kúsheyip atırǵan mine, usınday báhárli paslında miynetkesh diyqan hám fermerlerimiz, baǵman hám sharwashılarımızǵa ayrıqsha húrmet bildiremiz.
Joqarı dóretiwshilik ruwxı Jańa Ózbekstanımızda ámelge asırılıp atırǵan úlken reformalar hám jedel ózgerislerdiń negizgi mazmunı hám iygilikli ideyalarına sáykes keletuǵını gúmansız.
Pútkil mámleketimizde insan qádirin ulıǵlaw, sociallıq ádillik principlerin bekkemlew, xalıqtıń dáramatları hám turmıs dárejesin joqarılatıw jolında isenimli qádemler taslamaqtamız.
Elimizde kóplegen zamanagóy sanaat kompleksleri, infrastruktura hám logistika tarmaqları , avtomobil hám temir jollar qurılmaqta.
Biznes, «Ay-ti» hám turizm tarawları jedel rawajlanbaqta.
Mıńlaǵan jańa imarat hám turaq jaylar, baqsha hám mektepler, joqarı oqıw orınları, emlewxanalar, mádeniyat hám sport orayları qurılmaqta.
Qala hám awıllarımız, pútkil elimizdiń kelbeti barǵan sayın gózzal hám abat bolıp barmaqta.
«Jasıl mákan» ulıwmamilliy joybarı sheńberinde elimizde jańa ekologiyalıq ortalıq jaratılmaqta.
Hár jılı millionlaǵan náller egiw, jasıl baǵlar qurıw, haywanat dúnyasın qásterlep-saqlaw, hár bir qarıs jerden ónimli paydalanıw sıyaqlı joqarı ekologiyalıq mádeniy qádiriyatlar kúndelikli turmısımızdıń ajıralmas bólegine aylanbaqta.
«Qorshaǵan ortalıqtı qorǵaw hám «jasıl» ekonomika jılı» mámleketlik baǵdarlaması sheńberindegi úlken jumıslarımız bul processlerdi jáne de joqarı basqıshqa alıp shıǵatuǵınına isenemen.
Bizge belgili, xalqımız burın Nawrızdı «jıl bası» dep ataǵan. Biz de ata-babalarımız sıyaqlı usı ájayıp kúnde jaqsı niyetler etemiz:
Shıǵısqa tán Jańa jılımız qutlı kelsin, dáryalarımız suwǵa, qoymaxanalırımız ónimge tolsın!
Qurılısshılarımız, áziz hám húrmetli ustaz-muǵallimlerimiz, pidayı shıpakerlerimiz, ekonomikamızdıń súyenishi bolǵan ǵayratlı isbilermenlirimiz, elimizdiń qorǵawshıları hámiyshe saw-salamat bolsın!
Aldımızǵa qoyǵan úlken shekler hám ullı rejeler tolıq ámelge assın!
Húrmetli watanlaslar!
Nawrız – jaslıq hám jiger áyyyamı bolıp esalanadı.
Ómirge úlken arzıw-niyetler menen kirip kiyatırǵan jaslarımız Jańa Ózbekstannıń aldınǵı hám qúdiretli kúshine aylanıp atırǵanına hámmemiz guwamız.
Jigerli, talantlı perzentlerimizdiń isenimli hám márdana háreketleri pútkil dúnyada ayrıqsha kózge taslanıp atırǵanı bizdi oǵada quwandıradı.
Búgin mámleketimizdegi joqarı texnologiyalıq kárxanalardı basqarıp atırǵanlar – tiykarınan bilimli hám tájiriybeli jaslarımız bolıp esaplanadı.
Isbilermenliktiń rawajlanıwına jańa kúsh hám ǵayrat berip atırǵan da aqıllı, belsendi hám isbilermen ul-qızlarımız bolıp esaplanadı.
Shegaralarımızda bárqulla sergek turǵan ásker hám oficerler de márt ullarımız bolıp tabıladı.
Ilim, mádeniyat, ádebiyat hám kórkem óner tarawlarında Watanımızdı dúnyaǵa tanıtıp atırǵanlar da jaslar bolıp esaplanadı.
Atap aytqanda, elimizdi dúnyaǵa tanıtıwda jas sportshılarımızdıń ayrıqsha ornı hám úlesi bar.
Xalqımızǵa hár tárepleme múnásip bolǵan bunday náwqıran áwladımızǵa maqtawlar bolsın!
Áziz perzentlerim, sizler Watanımız aspanında jarqın juldızlar bolıp janatuǵın waqıt keldi.
Bul ullı maqset jolında mine, usı Nawrız pasılında tuwılǵan Abuxoliq Ǵijduwaniy, Bahawaddin Naqshband, Mırza Ulıǵbek, Zulfiyaxanım, Azat Sharafiddinov, Abdulla Oripov sıyaqlı oyshıl ǵayratkerler sizler ushın shın mánisindegi ibrat úlgisi bolıp esaplanadı.
Elimizdegi sheksiz imkaniyatlardı ámeliy nátiyjelerge aylandırıw ushın tınımsız háreket etiń!
Qay jerde bolmań, qaysı tarawda islemeń, milliy qádiriyatlarımızǵa, ózligimizge, Watanımızǵa múnásip hám sadıq bolıń!
Hesh qashan umıtpań, artıńızda sálkem 38 millionlıq ullı xalıq, Prezident turıptı.
Sizlerge bárqulla áwmet hám jeńisler qutlı bolsın!
Húrmetli bayram qatnasıwshıları!
Nawrızdıń biytákirar gózzalıǵı, bárinen burın, toǵız yarım mıńǵa shamalas máhállemizde ótkerilip atırǵan xalıq seyillerinde, bayram saltanatlarında óz kórinisin tabadı.
Kóp mıń jıllıq dástúrler hám zamanagóy qádiriyatlarımızdı ózinde jámlegen máhálle sistemasınıń turmısımızdaǵı ornı hám tásiri barǵan sayın artıp barmaqta.
Ásirese, túrli mashqala hám máselelerdi máhálleniń ózinde sheship atırǵanımız reformalarımızdıń xalıqshıllıǵı hám nátiyjeliligin keskin arttırmaqta.
Jaslar tárbiyası, tınıshlıqtı támiyinlew, kámbaǵallıqtı qısqartıw, xalıqtı isbilermenlikke tartıw, sociallıq qorǵaw hám hayal-qızlardıń belsendiligin kúsheytiw, ekologiya hám abatlıq sıyaqlı bir-birinen áhmiyetli wazıypalar máhálle jetligi sisteması arqalı nátiyjeli sheshim tappaqta.
Bizge belgili, bıyıl elimizde máhálle basshılarınıń saylawları bolıp ótedi.
Xalqımız bul juwapkershilikli processte pidayı hám watansúyiwshi watanlaslarımız ushın dawıs beredi, dep isenemen.
Máhállelerdi hár tárepleme rawajlandırıw bunnan bılay da itibarımız orayında boladı.
Pursattan paydalanıp, erteń – 22-mart kúni mámleketimizde keńnen belgilenetuǵın Máhálle sistemasınıń xızmetkerleri kúni menen barlıq watanlaslarımızdı, máhálle belsendilerin qızǵın qutlıqlap, olardıń abıraylı jumısında úlken jetiskenlikler tileymen.
Qádirli watanlaslar!
Nawrız burınnan xalqımızdıń milliy hám ulıwmainsanıylıq qádiriyatlarǵa, dúnyalıq mámleket principlerine, keńpeyillik, shın doslıq hám birge islesiw ideyalarına sadıqlıǵınıń ayqın simvolı bolıp esaplanadı.
Bul áyyyam elimizdegi barlıq millet hám xalıq wákilleri ushın súyikli, shın mániste, ulıwma xalıqlı bayramına aylanǵan.
Mine, usı quwanıshlı waqıtlarda pútkil xalqımızǵa múrájat etip aytpaqshıman:
biziń kúshimiz – awızbirshilikte,
qúdiretimiz – Watanǵa mehir hám sadıqlıqta,
jetiskenligimiz – ózimizge bolǵan joqarı isenimimizde!
Nawrızdıń Birlesken Milletler Shólkemi tárepinen xalıqaralıq bayram sıpatında tán alınǵanı bizge ayrıqsha qanaatlanıwshılıq baǵıshlaydı.
Nawrız bayramı házirgi kúnde barlıq xalıqlardı, sonıń ishinde, Oraylıq Aziya xalıqların jáne de birlestirmekte.
Búgingi imkaniyattan paydalanıp, sheksiz regionımızda jasap atırǵan haq niyetli insanlardı elimiz atınan qızǵın qutlıqlayman.
Shın mániste doslıq, tuwısqanlıq hám birge islesiw mákanına aylanıp atırǵan regionımız bárqulla tınısh bolsın, bárqulla gúllep-jaynasın!
Usı jerde regionımızdıń húrmetli zıyalıları, ilim, mádeniyat, kórkem óner hám ádebiyat ǵayratkerlerine múrájat etip aytpaqshıman.
Áziz doslar, sizler ayrıqsha talantınız, aqıl-oyıńız benen ázeliy tuwısqanlıǵımızdı, birdey qádiriyat hám úrp-ádetlerimizdi, jaqsı umtılıslarımızdı kórsetetuǵın shıǵarmalar dóretip, jaslarımızdı áyne, usı ruwxta tárbiyalawǵa úles qossańız, xalıqlarımız sizlerden, álbette, minnetdar boladı.
Bunday bárkamal dóretiwshilik úlgileri búgingi qıyın dáwirde ellerimiz, ásirese, jas áwladlarımızǵa bekkem mánawiy qalqan bolıp xızmet etetuǵını gúmansız.
Usı aydın sońında eski Xwjand qalasında Ózbekstan, Tájikstan hám Qırǵızstan jetekshileriniń úsh tárepleme ushırasıwı, mine, usı jılı jáne bir ámeliy qádem boladı, dep isenemen.
Pursattan paydalanıp, búgingi bayramımızda qatnasıp atırǵan sırt mámleketlerdiń húrmetli elshilerin, barlıq diplomatiyalıq korpus hám xalıqaralıq shólkemlerdiń wákillerin XALÍQARALÍQ Nawrız kúni menen qızǵın qutlıqlaymız.
Mámleketlerińiz hám xalıqlarıńızǵa doslıq sálemin jollaymız.
Húrmetli watanlaslar!
Bul umıtılmas, gózzal máwritlerde siz, ázizlerdi, barlıq watanlaslarımızdı Nawrız bayramı menen jáne bir márte qutlıqlayman.
Hár bir shańaraqqa, pútkil elimizge tınıshlıq, baxıt-ıǵbal hám qut- bereket tileymen!
Qádiriyatlarıńız máńgi bolsın, Nawrız!
Nawrız bayramı múbárek bolsın!