Qaraqalpaqstan Respublikası mektepke shekemgi hám mektep bilimlendiriwi ministrliginde baspasóz konferenciyası ótkerildi. Ilajǵa Qaraqalpaqstan Respublikası mektepke shekemgi hám mektep bilimlendiriwi ministri G.Kojabaeva, ministrdiń birinshi orınbasarı A.Dawletbaev, Q.Ismailov, ministrliktiń bólim baslıqları hám ǵalaba xabar qurallarınıń wákilleri qatnastı. Ilajda ministr G.Kojabaeva sózge shıǵıp, ótken 2024-jıl dawamında bilimlendiriw tarawında ámelge asırılǵan reformalar haqqında maǵlıwmat berdi.

Búgingi kúnde Qaraqalpaqstan Respubliksı boyınsha 1 874 mektepke shekemgi bilimlendiriw shólkemleri bolıp , sonnan 482 mámleketlik, 106 mámleketlik –jeke menshik sheriklik tiykarında, 17 jeke menshik jáne 1 269 shańaraqlıq mámleketlik emes mektepke shekemgi bilimlendiriw shólkemleri hám ulıwma orta bilim beriw mektepleri jámi 772 bolıp, sonnan 1 Prezident mektebi, 1 dóretiwshilik mektebi, 18 qánigelestirilgen mektep, 726 ulıwma bilim beriw mektebi jáne 8 jeke menshik mektep hám 18 Bárkamal áwlad balalar mektebi jumıs alıp barmaqta.
Qaraqalpaqstan Respublikası Mektepke shekemgi hám mektep bilimlendiriwi ministrliginiń baslaması hám Ózbekstan Respublikası Mektepke shekemgi hám mektep bilimlendiriwi ministrligi hám Qaraqalpaqstan Respublikası Joqarǵı Keńesiniń qollap-quwatlawı nátiyjesinde bilimlendiriw tarawında bir qatar reformalar ámelge asırıldı. Atap aytqanda Qaraqalpaqstan Respublikası Mektepke shekemgi hám mektep bilimlendiriwi ministrligi delegaciyası Angliyanıń Kembridj universitetine barıp, xalıqaralıq tán alınǵan Kembridj bilimlendiriw baǵdarlmasın engiziw boyınsha memorandumǵa qol qoyıldı. Ózbekstan Respublikası ulıwma bilim beriw mektepleri arasında birinshi márte Nókis qalasındaǵı 46-sanlı mektepke xalıqaralıq tán alınǵan Kembridj bilimlendiriw baǵdarlaması tiykarında oqıtıw sisteması engizildi. Ulıwma orta bilim beriw mektebi oqıwshıları arasında Qaraqalpaqstan telekanalı menen birgelikte “Bilimler báygisi” intellektuallıq teleoyının ótkeriw jolǵa qoyıldı. Jeńimpaz oqıwshılar Dubay qalasına tálim saparına jiberildi.
Ózbekstan Respublikası bilimlendiriw sistemasında birinshi márte Ámiwdárya rayonındaǵı barlıq mekteplerde Qaraqalpaqstan tájiriybesi sıpatında onlayn bilimlendiriw sapasınıń monitoringi ótkerildi.
Bilimlendiriw sapası tómen bolǵan mektepler menen islesiw sistemasın bunnan bılay da jetilistiriw boyınsha «Qaraqalpaqstan tájiriybesi» sıpatında «Metodikalıq tur» joybarı sheńberinde respublikalıq seminar shólkemlestirildi. Qaraqalpaqstan bilimlendiriw sistemasında birinshi márte Pán olimpiadasınıńÓzbekstan Respublikası basqıshı Nókis qalasında tabıslı ótkerildi. Qaraqalpaqstan Respublikası Mektepke shekemgi hám mektep bilimlendiriwi ministrliginiń kkbilimlendiriw.uz Bilimlendiriw platforması ministrlik janındaǵı 85 rezidentleri menen birgelikte iske qosıldı. Pán olimpiadasınıń Ózbekstan Respublikası basqıshında jeńimpaz bolǵan oqıwshılar ustazları menen birge Dubay qalasına bilimlendiriw saparına jiberildi. Ózbekstan Respublikası bilimlendiriw sistemasında birinshi márte «Qaraqalpaqstan tájiriybesi» sıpatında «Kásiplik bilimlendiriwdi rawajlandırıw kúni» engizildi. Jámiyetlik tárizde «Dóretiwshi muǵallimler olimpiadası» shólkemlestirildi. Ulıwma bilim beriw mekteplerindegi qánige hám ekinshi kategoriyalı muǵallimlerdi pedagog kadrlar attestaciyasına mánzilli tayarlaw sisteması engizildi.
Konferenciyada bıyılǵı oqıw ushın ministrlik tárepinen ámelge asırılatuǵın jumıslar, rejeler haqqında da maǵlıwmat berildi.
Ilajda ǵalaba xabar quralları wákilleri tárepinen sorawlar berilip, juwapkerler tárepinen tiyisli juwaplar alındı. Ushırasıp atırǵan kemshilikler, mashqalalar haqqında sóz etilip, olardı saplastırıw boyınsha pikirler aytılıp, aldaǵı waqıtları bul máseleler kórip shıǵılatuǵınlıǵı atap ótildi. Sonıń menen birge, jaqın arada tarawda ámelge asırılıw aldında turǵan jańalıqlar haqqında da sóz etildi.
Tarawdıń rawajlanıwına qaratılǵan reformalar dawam etpekte.

Qaraqalpaqstan xabar agentligi