Qaraqalpaqstan Respublikası «Vatanparvar» shólkemine qaraslı Nókis avtomobil mektebi hár jılı eki basqıshta 50 kursanttan jámi 100 kursanttı oqıtıp, olarǵa áskeriy-texnikalıq bilim berip kelmekte. Házirgi waqıtta usı mektepte áskeriy-texnikalıq qánigeler tayarlaw boyınsha jumıslar jedellestirilip, yuridikalıq mákemelerdiń avtomobil basqarıwshılarınıń oqıwların shólkemlestiriw boyınsha da ilajlar shólkemlestirilmekte.
– Kursantlardı tańlaw hám jıynaw qalalıq hám rayonlıq qorǵanıw isleri boyınsha bólimleri tárepinen ámelge asırılmaqta,-deydi mektep direktorı Úrgenishbay Dáwletov. – Mektebimizde 2016-2017-jıllarda jámi 488 million sumlıq kapital ońlaw jumısları ámelge asırıldı hám mektebimizdiń imaratı zamanagóy kóriniske endi.
Bunnan basqa 4 qabatlı jataqxanada da ońlaw jumısları alıp barıldı. Sonday-aq, aydawshılıqtıń «S» katogeriyası boyınsha oqıtılatuǵın klasslarǵa hám kompyuter xanalarına kerekli ásbap-úskeneler alındı.
Házirgi waqıtta mektepte «A» kategoriyasına kiretuǵın 9 dana áskeriy texnika (Kamaz, Zil), «B» kategoriyasına kiretuǵın 13 avtomobil texnikaları jaramlı halda xızmet etip turıptı. Zamanagóy úskenelerge iye trenajyorlıq, sport zalları, pnevmatikalıq oq atıw xanası, «Ashshıkól» janındaǵı avtodrom tolıǵı menen kursantlar xızmetinde.
Á.Jiemuratov,
Qaraqalpaqstan xabar agentliginiń xabarshısı.