Paytaxtımızda Ózbekstan Respublikası Ishki isler ministrligi Jol háreketi qáwipsizligi xızmeti xızmetkerleri arasında tańlaw baslandı.


Úsh kún dawam etetuǵın ilajǵa Tashkent qalası, wálayatlardan hám biziń respublikamızdan taraw xızmetkerleri qatnaspaqta.

«Turan» stadionında bolıp ótken ashılıw saltanatında Qaraqalpaqstan Respublikası Ishki isler ministri A.Temirxanov hám basqalar shıǵıp sóylep, tańlaw qatnasıwshılarına áwmet tiledi.

Atap ótilgenindey, Jol háreketi qáwipsizligi xızmeti xızmetkerleriniń kásiplik sheberligin arttırıw, olardıń xızmet, jawıngerlik, fizikalıq arnawlı tayarlıǵın jetilistiriw, ózlestirgen teoriyalıq bilimleri menen iyelegen kónlikpelerin anıqlaw baǵdarında kóplegen ilajlar ámelge asırılmaqta. Solardıń arasında dástúriy tárizde ótkerilip kiyatırǵan bul tańlaw ayrıqsha áhmiyetke iye.


Tańlaw qatnasıwshıları Jol háreketi qaǵıydaları boyınsha teoriyalıq imtixan, normativlik hújjetlerdi ózlestiriw baǵdarında test sınaǵı, svetofor hám tártipke salıwshı belgiler boyınsha ámeliy shınıǵıw basqıshlarında ózleriniń bilim jáne kónlikpelerin kórsetedi.


Esletip ótemiz, bul tańlaw Ózbekstan Respublikası Prezidentiniń 2017-jıl 11-iyuldegi «Jol háreketi qáwipsizligin támiyinlew sistemasın bunnan bılay da jetilistiriw ilajları haqqında»ǵı qararı, sonday-aq, Ózbekstan Respublikası Ishki isler ministriniń usı jıl 16-marttaǵı «Ishki isler uyımlarınıń Jol háreketi qáwipsizligi xızmeti xızmetkerleri arasında respublikalıq tańlaw ótkeriw haqqında»ǵı buyrıǵı tiykarında ótkerilmekte.

D.ABIBULLAEV,

Qaraqalpaqstan xabar agentliginiń xabarshısı.