Jaqında Qaraózek rayonlıq «Nuranıy qorı» hám Puqaralardıń ózin-ózi basqarıw uyımlarınıń jumısın muwapıqlastırıw boyınsha Qaraózek rayonlıq Keńesi, sonday-aq, «Dosnazarov» awıl puqaralar jıyınınıń bir topar basshıları ekinshi jer júzilik urıs qatnasıwshısı Genjemurat Allaniyazovtıń hal-jaǵdayınan xabar aldı.

Ekinshi jer júzilik urıs qatnasıwshısın fashizm ústinen erisilgen jeńistiń 73 jıllıǵı menen qutlıqladı.

Genjemurat Allaniyazov 1925-jılı tuwılǵan. 1943-jılı urısqa atlanǵan. Ol urıs dáwirindegi qıyınshılıqlar haqqında jıynalǵanlarǵa aytıp berip, tınısh hám baxıtlı turmısımızǵa shúkirshiligi kóp ekenligin, Elbasshımızdıń kórsetip atırǵan ǵamqorlıǵına minnetdarshılıǵın bildirdi. Veteran atamız «Dosnazarov» awıl puqaralar jıyınıńda jasamaqta.

G.Allaniyazovqa ótken jılı Prezidentimiz tárepinen 2 mln sum aqshalay sıylıq hám «Damas» markalı avtomashinası gezeksiz tapsırılǵan edi. Usı jılı 5mln muǵdarında aqshalay sıylıq beriliwi rejelestirilgen.

Bul ilajlar Ózbekstan Respublikası Prezidentiniń usı jıl 16-apreldegi «Ekinshi jer júzilik urıs qatnasıwshıların xoshametlew haqqında»ǵı pármanı, sonday-aq, «Eslew hám qádirlew kúnine tayarlıq kóriw hám onı ótkeriw ilajları haqqında»ǵı qararınıń orınlanıwın támiyinlew maqsetinde ámelge asırılmaqta.

Maǵlıwmat ornında sonı da aytıp ótiw kerek, Qaraózek rayonında búgingi kúnde 37 miynet frontı qatnasıwshısı bolıp, jaqın arada olardıń da hal-jaǵdayınan xabar alınadı.

Qaraqalpaqtan xabar agentligi