So‘nggi kunlarda O‘zbekiston milliy terma jamoasi va Fransiyaning “Lans” klubi a’zosi Abduqodir Husanov qishki transferlar davrida o‘zining yangi jamoasiga o‘tishi kutilayotgani haqida xabarlar ko‘paymoqda.
“Lans” klubi Abduqodirga da’vogarlar ko‘pligidan foydalangan holda ushbu o‘yinchiga qay bir jamoa ko‘p pul taklif qilsa, o‘sha jamoa bilan kelishuvni amalga oshirishni o‘z oldiga maqsad qilib qo‘ygani barchaga ma’lum.
Shu bois ham “Lans” jamoasi mutasaddilari futbolchimizning transferi bilan shug‘ullanishni mashhur agent Jorje Mendeshga ishonib topshirdi. Hozirda portugaliyalik mutaxassis “PSJ”, “Manchester Siti” va “Real” kabi grand klublar bilan transfer borasida dastlabki muzokaralarni o‘tkazib bo‘ldi.
Navbatda “Bayer Leverkuzen”, “Napoli”, “Yuventus”, “Borussiya Dortmund”, “Nyukasl”, “Tottenxem” kabi klublar bor. Garchi bu jamoalar hali aniq taklif bilan chiqmagan bo‘lsada, yosh iste’dodli o‘zbek o‘g‘lonini o‘z saflariga qo‘shib olishga qiziqmoqda.
Biroq, barcha jamoalar orasida “Manchester Siti” va “Real” klublari aynan A.Husanovdek himoyachiga katta ehtiyoj sezmoqda. Har ikki klub tarkibdagi muammoli vaziyatdan kelib chiqib, jamoada uzoq muddat o‘ynashi mumkin bo‘lgan markaziy himoyachiga muhtoj.
Aniqroq aytadigan bo‘lsak, “MS” ustozi Xosep Gvardiola jarohat tufayli Jon Stounz va Ruben Diash kabi markaziy himoyachilaridan foydalana olmayapti. Natan Ake va Manuel Akanji esa bir maromda o‘ynay olmayotgani turli muammolarni keltirmoqda.
Karlo Anchelotti qo‘l ostidagi “Real” klubining tajribali himoyachisi Eder Militaoning og‘ir jarohati sabab, madridliklar tarkibida aynan markaziy himoyachiga talab ortgan. To‘g‘ri, Yevropaning kuchli beshlik chempionatlarida tajribali himoyachilar bor, biroq ularning transfer narxlari baland ekani bois, “MS” va “Real” uchun 25-30 million yevro evaziga ulardan qolishmaydigan Abduqodir Husanovni sotib olish maqbul yechimdir.
Nima bo‘lganda ham qishki transferlar oynasida Abduqodir Husanov katta ehtimol bilan Yevropaning top klublaridan birigi o‘tishi shubhasiz. Biroq, yosh futbolchimiz nomdor jamoa tarkibiga o‘tib, zaxirada qolgandan ko‘ra, Yevropaning o‘rtamiyona jamoalarida muntazam o‘yin amaliyotiga ega bo‘lishi biz uchun o‘ta muhim.
Ayniqsa, Abduqodirning terma jamoamiz safida jahon chempionatiga chiqish yo‘lidagi bahslarda himoya chizig‘ini qo‘riqlashi biz uchun ahamiyatli.
Javohir Toshxo‘jayev, O‘zA