Italiyaning Milan va Kortina shaharlarida 2026 yilning 6-22 fevral kunlari XXV qishki Olimpiya o‘yinlari bo‘lib o‘tadi.
Xalqaro konkichilar ittifoqi (ISU) figurali uchish sport turi bo‘yicha mazkur Olimpiya o‘yinlari uchun saralash turnirini 2025 yilning 17-21 sentyabr kunlari Xitoyning Pekin shahrida o‘tkazilishi haqida qaror qabul qildi.
Biz uchun ahamiyatlisi shundaki, ushbu saralash turnirida figurali uchishning sport juftligi yo‘nalishida O‘zbekiston terma jamoasi a’zolari Yekaterina Geynish hamda Dmitriy Chigirev ham ishtirok etishi mumkinligidir. Shuni ta’kidlash joizki, Yekaterina va Dmitriy joriy yilning oktyabr oyida Kanada mezbonligida o‘tgan Gran-pri bosqichida 189,65 ball to‘plab kumush medalga ega chiqdi. Hozirda bu juftlik jahon reytingida 38, mavsum reytingida esa 12-o‘rindan joy olgan.
Umid qilamizki, Yekaterina Geynish hamda Dmitriy Chigirev 2025 yili ISU tomonidan o‘tkaziladigan “Skate America”, “Cup of China”, “Skate Canada”, “NHK Trophy”, “Grand Prix de France”, “Finlandia Trophy” kabi Gran-pri bosqichlarida va Xitoyda o‘tadigan kvalifikatsion turnirda muvaffaqiyatli ishtirok etadi.
Javohir Toshxo‘jayev, O‘zA