Mamlakatimiz mezbonligida o‘tayotgan futzal bo‘yicha jahon chempionatida Braziliya va Argentina terma jamoalari yarim final bosqichidan muvaffaqiyatli o‘tdi.

Poytaxtimizdagi “Humo arena“ sport majmuasida tashkil etilgan yarim final bahslarida Argentina 3:2 hisobida Fransiyani mag‘lubiyatga uchratgan bo‘lsa, Braziliya ham ushbu hisobda Ukrainani dog‘da qoldirdi. Shu tariqa, Braziliya va Argentina terma jamoalari jahon chempionati g‘olibligi uchun o‘zaro kuch sinashadigan bo‘ldi. Yarim final bellashuvlarda mag‘lub bo‘lgan Ukraina va Fransiya termalari esa 3-o‘rin uchun o‘tadigan bahsda to‘qnash keladi.

Mazkur o‘yinlar “Humo arena”da 6 oktyabr kuni bo‘lib o‘tadi. Aniqroq aytadigan bo‘lsak, shu kuni uchinchi o‘rin uchun tashkil etiladigan uchrashuv mahalliy vaqt bilan 17:30 da start olsa, final bahsi soat 20:00 da boshlanadi.

Javohir Toshxo‘jayev, O‘zA