Xitoyning Xarbin shahrida 2025 yilning 7-14 fevral kunlari IX qishki Osiyo o‘yinlari tashkil etilishi munosabati bilan joriy yilning 23-25 sentyabr kunlari qit’a sport delegatsiyalari uchun tashkil etilgan seminarda Osiyo mamlakatlari qatori O‘zbekiston sportchilariga ham chorlov yo‘llandi.
O‘zbekiston Milliy Olimpiya qo‘mitasi vakillari ishtirok etgan anjumanda “Xarbin-2025” o‘yinlari tashkiliy qo‘mitasi o‘tadigan musobaqalar, tadbirlar xususida keng qamrovli ma’lumot taqdim etdi.
Xitoy tomoni IX qishki Osiyo o‘yinlarining muz ustida kechadigan sport turlaridagi musobaqalar Xarbinda, ochiq havodagi bellashuvlar Yabuli shahrida o‘tkazilishini aytib o‘tdi.
Seminar davomida delegatsiya a’zolari “Xarbin-2025” o‘yinlarining inshootlari, sport jamoalari yashaydigan mehmonxonalarda yaratilgan sharoitlar bilan tanishdi.
O‘yinlar davomida turli ko‘ngilochar dasturlar tashkil etilishi, Xarbinda uyushtiriladigan muz haykallar festivali IX qishki Osiyo o‘yinlarining tashrif qog‘oziga aylanishi bildirildi, deyiladi Milliy olimpiya qo‘mitasi xabarida.
T.Ro‘ziyev, O‘zA