Raqamli texnologiyalar vaziri Sherzod Shermatov Jahon bankining Raqamli global amaliyotni rivojlantirish direktori Kristin Syan bilan uchrashuv o‘tkazdi.

Unda hamkorlik ishlarini davom ettirish, kelgusida qo‘shma loyihalarni amalga oshirish masalalari muhokama qilindi.

Uchrashuvda Raqamli inklyuzivlik loyihasining ishga tushirilishi Jahon banki bilan kelgusidagi hamkorlik loyihalarining davom ettirilishi uchun muhim qadam bo‘lishi ta’kidlandi.

Shuningdek, uchrashuv davomida Davlatimiz rahbari tomonidan mamlakatimizda raqamli texnologiyalar sohasida amalga oshirilayotgan islohotlar, IT kompaniyalar uchun yaratilgan shart-sharoitlar bilan tanishtirildi va IT Park hududida joriy etilgan maxsus soliq imtiyozlar tizimining imkoniyatlariga alohida urg‘u berildi.

Bu borada IT sohadagi yirik xorijiy kompaniyalarni O‘zbekistonga jalb qilish uchun Jahon banki imkoniyatlaridan foydalanish va bu orqali IT  xizmatlar eksporti hajmini oshirish bo‘yicha takliflar ko‘rib chiqildi.

Jahon bankining Raqamli global amaliyotni rivojlantirish direktori O‘zbekistonda raqamli transformatsiyalash jarayonlarining borishini yuqori baholadi.

Ta’kidlanganidek, yoshlarni AKT sohasiga keng jalb etish orqali ularning bandligini oshirish, yuqori haq to‘lanadigan ish o‘rinlarini yaratish – vazirlik faoliyatidagi ustuvor vazifalardan biri hisoblanadi.

Shuni hisobga olgan holda uchrashuvda ITES ( axborot texnologiyalariga asoslangan xizmatlar) sohasi bozorida yangi ish o‘rinlarini yaratish yo‘nalishidagi loyihalarni yanada kengaytirish imkoniyatlari ham muhokama qilindi.

N.Rahmonova, O‘zA