Chexiya Respublikasi Bosh vaziri Andrey Babish rasmiy tashrif bilan mamlakatimizda bo‘lib turibdi.

Oliy martabali mehmon 29-aprel kuni “Yangi O‘zbekiston” bog‘iga tashrif buyurib, O‘zbekiston Respublikasi Bosh vaziri Abdulla Aripov hamrohligida Mustaqillik monumenti poyiga gulchambar qo‘ydi.

Mamlakatimiz o‘tmishi va kelajagi timsoli sanalgan Mustaqillik monumenti Yangi O‘zbekiston ma’naviyatning gultojidir. U yerda kamolot sohiblari bo‘lmish ajdodlarimiz siymosi aks etgan.

Chexiya Bosh vaziri Mustaqillik monumenti poyiga gulchambar qo‘yar ekan, umrini zamin taraqqiyoti, el farovonligi yo‘lida ilm-ma’rifat bilan o‘tkazgan ajdodlarimiz xotirasiga ehtirom ko‘rsatib ramziy bosh egdi.

Yurtimiz tarixi, dunyo tamadduniga hissa qo‘shgan bobolarimiz ma’rifati haqida ma’lumotlarga ega bo‘ldi.

 Marhabo HOJIAKBAROVA, Nosirjon HAYDAROV (surat), O‘zA