Barcha sohalar qatori qishloq xoʻjaligidagi islohotlar ham xalqimiz manfaatiga xizmat qiladi

Prezidentimiz Shavkat Mirziyoyev 12-oktyabr kuni qishloq xoʻjaligida amalga oshirilayotgan islohotlar, jumladan, paxta yigʻim-terimining borishi bilan tanishish maqsadida Toshkent viloyati Boʻka tumanidagi “Valixon ota” fermer xoʻjaligiga tashrif buyurdi.

Joriy yilda ob-havoning noqulay kelishi dehqonlarimizga bir qator qiyinchiliklar tugʻdirdi. Ayniqsa, bahor faslida yogʻingarchilik kam boʻlgani sababli chigit ekishda kechikishlar kuzatildi.

Dehqonlarning moddiy manfaatdorligini oshirish, gʻoʻza parvarishidagi qoloqlikni bartaraf etish maqsadida davlatimiz tomonidan fermerlarga barcha zarur sharoitlar yaratib, qoʻshimcha agrotexnik tadbirlar oʻtkazish uchun moddiy-resurslar zarur miqdorda va oʻz vaqtida yetkazib berildi.

Toshkent viloyatida bu yil 75 ming 800 gektar maydonda gʻoʻza parvarish qilinib, ayni paytda yetishtirilgan hosilni nest-nobud qilmay yigʻishtirib olishga alohida eʼtibor qaratilmoqda.

Fermerlarning har tomonlama qoʻllab-quvvatlangani gʻoʻza parvarishida agrotexnik tadbirlarni oʻz vaqtida amalga oshirish va moʻl hosil yetishtirish imkonini berdi.

Jumladan, viloyatda faoliyat koʻrsatayotgan laboratoriyalar tomonidan yetarli miqdorda biomahsulotlar tayyorlanib, fermer xoʻjaliklariga yetkazib berildi. Koʻsak qurti va oʻrgimchakkana kabi zararkunandalar va turli kasalliklarga qarshi kimyoviy usulda kurashish ilmiy-amaliy yondashuv asosida olib borildi.

Tumanlarda tashkil qilingan mexanizatorlar uylarida dala mehnatkashlari uchun qulay ish va dam olish sharoiti yaratilgani gʻoʻza parvarishida gʻanimat kunlardan unumli foydalanishda muhim ahamiyat kasb etdi.

Prezidentimiz viloyatning bir guruh ilgʻor fermer xoʻjaliklari rahbarlari, qishloq xoʻjaligi sohasi mutasaddilaribilan muloqotda boʻldi.

Joriy yilda Boʻka tumani paxtakorlari 13 ming gektarga yaqin maydonda gʻoʻza parvarish qildi. Mahalliy iqlimga mos, serhosil gʻoʻza baravj rivojlanib, qiygʻos ochilgan.

Uchrashuvda paxta yigʻim-terimi ishlarining borishi, takroriy ekin ekish holati, viloyat iqtisodiyotini yanada rivojlantirish, xorijiy davlatlar bilan hamkorlik masalalari muhokama etildi.

– Bu yilgi qurgʻoqchilik dehqonlarimiz uchun haqiqiy sinov boʻldi, – dedi Prezidentimiz. – Biz hosilni yetishtirish uchun ularga zarur sharoitlar yaratib berdik. Paxta hosilini yigʻib-terib olishda narx ikki barobar oshirildi. Jumladan, Toshkent viloyatida bir kilogramm paxta uchun 1000 soʻmdan ziyod pul toʻlanmoqda.

Davlatimiz rahbari barcha sohalar qatori qishloq xoʻjaligida ham asosiy maqsad xalqimiz manfaati ekanini, qaysi mahsulot koʻproq daromad keltirsa, oʻsha ekin ekilishi zarurligini taʼkidladi.

– Manfaatdorlik boʻlishi uchun qilingan xarajatni qoplab, foyda koʻrish kerak. Ertangi kuni bugunidan yaxshi boʻlishi uchun har bir odam oʻzi harakat qilishi lozim. Bugun kim yutadi – intilgan yutadi, mehnat qilgan yutadi, – dedi Shavkat Mirziyoyev.

“Valixon ota” fermer xoʻjaligining 72,6 gektar yer maydoni mavjud boʻlib, 26 kishi mehnat qiladi. Joriy yilda xoʻjalik gʻalladan 222 million soʻm daromad oldi. 35,6 gektar maydonga ekilgan paxtadan 300 million soʻmdan ziyod daromad olishni rejalashtirmoqda.

Fermer xoʻjaligida ikkilamchi ekin ekish ishlariga ham alohida eʼtibor qaratilmoqda. Jumladan, gʻalladan boʻshagan maydonga kartoshka, sabzavot, dukkakli va ozuqabop ekinlar ekilgan. Bu 100 million soʻmdan ortiq daromad olish imkonini beradi.

Davlatimiz rahbari fermer xoʻjaligi dalasida sinovdan oʻtkazilayotgan zamonaviy paxta terish mashinasi bilan tanishdi. Ushbu mashina paxtani toza terishi, ish unumdorligi yuqoriligi bilan ajralib turadi. Kam xarajat talab qiladi.

Prezidentimiz muloqot soʻnggida sohaga innovatsion texnologiyalarni kengroq jalb etish, hosilni yogʻin-sochinli kunlarga qoldirmasdan yigʻishtirib olish lozimligini qayd etdi.

Uchrashuvda fermerlar bunday ochiq muloqotlar ularga kuch-quvvatberib, gʻayrat-shijoatini oshirishini taʼkidladi.

 

Ziyodulla Jonibekov, OʻzA