Bugun, 21 noyabrdan poytaxtimizdagi Xalqaro shaxmat akademiyasida mamlakatimizda an’anaviy tarzda o‘tkazib kelinayotgan “Prezident kubogi-2024” musobaqalari boshlanadi.
Dunyoning ko‘zga ko‘ringan grossmeysterlari FIDE reytingidagi o‘rinlariga qarab “A” va “V” guruhlariga joylashib, dona surishadi. Mukofot jamg‘armasi 75 ming AQSH dollarini tashkil etuvchi musobaqa qiziqarli bahslarga boy o‘tishi aniq.
“A” guruhi bahslarida Nodirbek Abdusattorov, Javohir Sindorov, Shamsiddin Vohidov, Nodirbek Yoqubboyev singari taniqli grossmeysterlarimiz hamda iste’dodli yosh shaxmatchilarimiz O‘zbekiston sharafini himoya qiladi.
N.Abdusattorov xalqaro turnirning birinchi raqamli ishtirokchisi sifatida saralangan. Eronlik Parham Magsudlu ikkinchi, uning hamyurti Amin Tabatabai uchinchi raqam ostida tasniflangan.
Barcha to‘qqiz uchrashuvni birinchi taxtada o‘tkazadigan Nodirbek Abdusattorov bugun kunning ikkinchi yarmida boshlanadigan 1-tur bahsida qora donalarda hindistonlik Sambit Panda bilan kuch sinashadi. Javohir Sindorov FIDE bayrog‘i ostida musobaqada qatnashayotgan Yekaterina Golseva, Shamsiddin Vohidov esa hindistonlik Etan Vazga qarshi kurash olib boradi.
O‘zbekiston shaxmat federatsiyasi xabariga ko‘ra, mazkur musobaqani bevosita kuzatishga ishtiyoqmand shaxmat muxlislariga qo‘shimcha qulaylik yaratish maqsadida maxsus “fan zona” tashkil etildi. Bu yerda siz o‘yinlarni kuzatish va shaxmat atmosferasidan bahramand bo‘lishingiz mumkin.
30 noyabr kuniga qadar davom etadigan “Prezident kubogi-2024” musobaqasining tantanali ochilish marosimi bugun bo‘lib o‘tadi.
T.Ro‘ziyev,
O‘zA