Rektor, O‘zbekiston Respublikasi fan arbobi Rustam Xolmurodov boshchiligidagi Samarqand davlat universiteti jamoasi Xitoyning Sian arxitektura va texnologiya universiteti (SATU) vakillari bilan “ZOOM” platformasi orqali uchrashuv o‘tkazdi.
Muzokara chog‘ida xalqaro aloqani yanada rivojlantirish, SamDU va SATU hamkorligi doirasida kimyo texnologiyasi, materialshunoslik, aniq va tabiiy fanlar, arxitektura kabi sohalarda akademik almashinuvni yo‘lga qo‘yish masalasi batafsil muhokama qilindi.
– Buyuk Ipak yo‘li orqali bog‘langan o‘zbek va xitoy xalqlari o‘rtasidagi aloqa uzoq o‘tmish sahifalariga borib taqaladi, – deydi R.Xolmurodov. – bugungi kunda ko‘pgina yo‘nalishlarda hamkorligimiz mavjud. SamDU va Xitoy universitetlari o‘rtasidagi aloqalar ham boy tarixga ega. Shanxay, Uxan davlat universitetlari, Shensi fan va texnologiya universiteti, Xinjiang fizika va kimyo texnikasi instituti shular jumlasidan. Ayni jarayonda tadqiqotchilarimiz Xitoy universitetlarida o‘qib, tajriba orttirib qaytgan. Sian arxitektura va texnologiya universiteti bilan amalga oshirilishi ko‘zda tutilayotgan hamkorlik zamirida ham shunday maqsad yotibdi. Endi nafaqat o‘qituvchilar, balki talabalar, magistrlar, doktorantura tadqiqotchilari ham mazkur universitetda stajirovka o‘tashi mumkin bo‘ladi. Qo‘shma ta’lim dasturlari va ilmiy almashinuv yuzasidan olib borilgan aloqalar, albatta, samara beradi. Ishonamanki, mazkur uchrashuv ikki nufuzli universitet nigohini birlashtirgan holda ilm-fan olamida chuqur salohiyatli yangi avlodni kashf etishga xizmat qiladi.
– bugungi uchrashuvda Sian arxitektura va texnologiya universiteti va SamDU munosabatini kengaytirish muhokama qilindi, – deydi kimyo fakulteti dekani Sanjar Tillayev, – Hozir aniq va tabiiy fanlar, materialshunoslik, menejment, inson resursini boshqarish, arxitektura va san’atshunoslik kabi bugungi kunning eng dolzarb yo‘nalishlarida magistr va doktorantlar almashinuvini yo‘lga qo‘yish bo‘yicha kelishuvga erishildi. SATU professorlarining mavjud imkoniyat va salohiyatini SamDU olimlari bilan birlashtirgan holda barqaror rivojlangan kelajak asosini yaratuvchi ilmiy yangiliklarga erishish, ilmiy-akademik almashinuv asosida tadqiqot olib borish masalasida qator amaliy takliflar ilgari surildi. O‘ylaymanki, Samarqand davlat universiteti bilan SATU o‘rtasidagi hamkorlik dunyo bo‘ylab dolzarb mavzularda tadqiqot olib borish, ilm-fan olamida yangi kashfiyot va yangiliklar yaratish uchun mustahkam zamin yaratadi.
Uchrashuv davomida Samarqand davlat universiteti hamda Sian arxitektura va texnologiya universitetlari o‘rtasida hamkorlik memorandumi imzolandi.
Mazkur tashrif ikki mamlakat o‘rtasida ilm-fan va ta’lim sohasidagi mustahkam hamkorlikni istiqbolli sohalarda yo‘lga qo‘yishning muhim vositasi bo‘ldi.
Iroda Bekmurodova,
SamDU axborot xizmati xodimi,
Shavkat Akramov (surat)