O‘zbekiston Rspublikasi Oliy Majlisi Qonunchilik palatasi Spikeri o‘rinbosari, O‘zbekiston fermer, dehqon xo‘jaliklari va tomorqa yer egalari Kengashi hamda O’zLiDeP Siyosiy Kengashi Ijroiya qo‘mitasi raisi Aktam Haitov Orolbo‘yiga tashrifi davomida dehqon va fermer xo‘jaliklari rahbarlari, tadbirkorlik sub’ekti vakillari bilan uchrashdi.
“Dolzarb 30 kunlik” davomida qishloq ho‘jaligi sohasidagi ishlarni yanada jadallashtirish, agrotexnik tadbirlarni o‘z vaqtida olib borish, dala va tomorqalarda yetishtirilayotgan hosilning sifatli bo‘lishini ta’minlash maqsadida Xo‘jayli tumanidagi “Samanko‘l” ovul fuqarolar yig‘ini hududidagi “Shukurullayeva Tolg‘anay” fermer xo‘jaligida seminar tashkil qilindi. Unda tumanda faoliyat yuritayotgan dehqon va fermer xo‘jaliklari rahbarlari, hokim yordamchilari va yoshlar yetakchilari ishtirok etdi.
Seminarda partiya rahbari davlatimiz rahbarining joriy yilning 27 iyul kungi paxtachilikdagi dolzarb ishlar muhokamasi yuzasidan o‘tkazilgan yig‘ilishda belgilab bergan ustuvor vazifalar, so‘nggi yillardagi iqlim o‘zgarishlari paxtachilik oldiga yangi vazifalar qo‘yayotgani, barcha hududlarda amalga oshirish bo‘yicha “Dolzarb 30 kunlik” e’lon qilinganini, hozirgidek ob-havoning anomal issiq paytida hosilni saqlab qolish, yerdan unumli foydalanish bo‘yicha kerakli tavsiya va maslahatlar berildi. “Shukurullayeva Tolg‘anay” fermer xo‘jaligi asosan paxta va g‘alla yetishtirishga mo‘ljallangan bo‘lib, 66 gektarning 39 gektari paxtaga, 15 gektari bug‘doyga yo‘naltirilgan. Shamurat Yesshanov rahbarlik qiladigan mazkur fermer xo‘jaligida bugungi kunda 11 kishi doimiy va 60 nafarga yaqin kishi mavsumiy ish olib bormoqda.
Keyingi manzil Beruniy tumanidagi Shabboz ovul fuqarolar yig‘ini hududida sektor rahbarlari va sohaga tegishli mas’ullar ishtirokida o‘tkazilgan dala seminarida tadbirning mazmun-mohiyati va bajarilishi lozim bo‘lgan ishlar tushuntirildi.
Tomorqadan unumli foydalanish issiqxona tashkil qilgan holda bir yil davomida 3 marotaba hosil olish uzumchilikni rivojlantirish bo‘yicha tumanda yaratilgan imkoniyatlar qayd etildi. Tomorqa klasteri tomonidan uzumchilik yo‘nalishi, undan olinadigan foyda va tok yetishtirish sirlari o‘rgatildi.
Tumandagi ibn-Sino mahallasida 3 sotix yerda uzumning 5 xil navi yetishtirilayotgan bo‘lib, o‘z vaqtida berilgan e’tibor sabab bu yil mo‘l hosil olinmoqda.
Seminar ishtirokchilari bog‘bonning tomorqasini ko‘zdan kechirib, tajribasi bilan o‘rtoqlashdi.
“Beruniy tekstil invest” mas’uliyati cheklangan jamiyati tomonidan 2022 yilning 6 oyi davomida 6 million 107 ming dollarlik ip kalava mahsuloti Xitoy va Turkiya davlatlariga eksport qilingan.
2021-2022 yilgi dasturga 900 million dollarlik investitsiya kiritilgan bo‘lib, Turkiya va Yaponiya davlatlari hamkorligidagi “Juki” kompaniyasidan 540 ming dollarlik tikuv mashinalari keltirib o‘rnatilgan. Loyiha qiymati 15,5 mlliard so‘mni tashkil etadi. Loyiha ishga tushirilishi bilan 500 ta yangi ish o‘rni yaratiladi.
Spiker o‘rinbosarining tashrifi To‘rtko‘l tumanida ham davom etdi.
Dovud Abibullayev, O‘zA