Өзбекстан Президентиниң Вашингтонға сапары шеңберинде мәмлекетимиз басшысы менен сөйлесиўде болған АҚШ Конгреси Ўәкиллер палатасының ағзасы Сидни Камлагер-Дав ҒХҚ ўәкиллериниң қысқа сораўларына жуўап берди:

– Бул ушырасыў Өзбекстан Президенти менен биринши сөйлесиўиңиз бе?

Аўа, мен Өзбекстан жетекшиси менен әжайып ушырасыў өткердим, деп айта аламан. Президент Шавкат Мирзиёев сөйлесиў ўақтында өзиниң турмыслық тәжирийбеси ҳәм мәмлекеттиң келешеги бағдарындағы көзқараслары менен ортақласты. Мен оның жоқары ҳәм мектепке шекемги билимлендириў тараўында ерискен жетискенликлери, мәмлекетте ҳаял-қызларды басшылық лаўазымларына тартыў жолындағы жумысларынан илҳамландым. Сондай-ақ, ҳәр еки тәреп ушын пайда келтиретуғын қатнасықлардың әҳмийети ҳаққында сөйлестик. Мен Президентти футбол бойынша Өзбекстан миллий сайланды командасы жәҳән чемпионатына жоллама алғаны менен де қутлықладым. Жәҳән чемпионаты ўақтында өз округимде елиңизден келетуғын барлық мийманларды күтип алыўды ҳәм оларды 2028-жылғы Олимпиада ойынларында және қабыллаўды интизарлық пенен күтемен.

– Мәмлекетимиз басшысының Вашингтонға сапары ҳаққында қандай пикирдесиз?

– Мениң пикиримше, Президенттиң С5+1 саммити ушын АҚШқа сапары Өзбекстан Орайлық Азияда қаншелли әҳмийетли орын ийелейтуғынын көрсетеди. Ушырасыўларда қатнасқанымыздан қуўанышлымыз. С5+1 саммити Конгресс ағзалары ушын оғада әҳмийетли екенин ҳәмме аңлап жетеди, деп үмит етемен.

– Соңғы жыллары елимизде әмелге асырылып атырған экономикалық ҳәм сиясий реформаларды қалай баҳалайсыз?

– Сөйлесиў даўамында биз Орайлық Азия мәмлекетлери, соның ишинде, Өзбекстанға да байланыслы әмелдеги Жексон-Вэник дүзетиўин бийкарлаў ҳаққында, сондай-ақ, шегара қәўипсизлиги ҳәм экономиканың гүллеп-жайнаўы ҳаққында сөйлестик.

Усы жерде Өзбекстан АҚШ пуқаралары ушын 30 күнлик визасыз режим енгизгенин қоллап-қуўатлайман. Мениңше, бул еки мәмлекет арасында мәденият ҳәм билимлендириў алмасыўын раўажландырыўдың әжайып усылы. Шавкат Мирзиёев жүдә узақты көре алатуғын Президент.

– Кейинги ўақытта Орайлық Азияда көплеген унамлы өзгерислер жүз берди. Регион мәмлекетлери бир-бирине жақынласты, қатнасықлар және де дослыққа айланды. Бул жаңалықларда Өзбекстан, атап айтқанда, жетекши Шавкат Мирзиёевтиң орны қандай, сизиңше?

– Мен Конгрессте Қубла ҳәм Орайлық Азия бойынша төменги комитет ағзасыман. Сол себепли АҚШ ҳәм Өзбекстан қатнасықларын раўажландырыўға жәрдемлесиў мен ушын оғада әҳмийетли. Өзбекстан пүткил регионда шешиўши орын ийелегенин тән аламан. Солай екен, турақлылық, экономикалық абаданлық, тынышлық – бул мәселелердиң барлығы Өзбекстан пүткил регион бойлап қатнасықларды басқарыўы ҳәм регион көлеминде сондай қүдиретли күш сыпатында көрине алыў қәбилетине байланыслы, деп ойлайман.

Өткир Алимов таярлады.

ӨзА