Өзбекстан мәмлекетлик денетәрбия ҳәм спорт университети ректоры Рашид Маткаримов хызмет сапары менен университеттиң Нөкис филиалында болып, бул дәргайда билим алып атырған студентлер менен ушырасты.
Ушырасыўда университет ректоры студентлерге соңғы жыллары елимизде жаслардың жоқары оқыў орынларында билим алыўлары ушын жаратылған имканиятлар, Президентимиз арнаўлы қарарлары тийкарында спортты раўажландырыў, тараўды жетик кадрлар менен тәмийинлеў бойынша исленип атырған жумыслар ҳаққында кең түрде айтып өтти.
Сондай-ақ, студент жасларға академик мобиллик, устазлары басшылығында илимий мақалалар жазыўды үйрениў ҳәм оқыў орнының имканиятларынан нәтийжели пайдаланыў кереклиги ҳаққында түсиниклер берди.
Ушырасыўда студентлер ректорға бир қатар сораўлар берип, оларға тийисли жуўаплар алды.
Буннан соң Өзбекстан мәмлекетлик денетәрбия ҳәм спорт университети ректоры Рашид Маткаримов филиалда тазадан шөлкемлестирген «Регистратор офис»тиң жумысы менен танысып, филиал жумысын раўажландырыў бойынша өзиниң баҳалы пикирлерин билдирди.
Соның менен бирге, ректор филиалдың Мәлимлеме ресурс орайының жумыслары менен танысты ҳәм китап фондын керекли әдебиятлар ҳәм илимий диссертациялардың нусқалары менен толықтырыў бойынша өзиниң усынысларын билдирди.
Сондай-ақ, университет ректоры Рашид Маткаримов Өзбекстан мәмлекетлик денетәрбия ҳәм спорт университети Нөкис филиал директоры менен биргеликте 2025-жылы қурылыўы режелестирилген филиал жатақханасы салынатуғын орын, «Туран» стадионы ҳәм Өзбекстан футбол ассоцациясы жанындағы Қарақалпақстан футбол академиясында алып барылып атырған реконструкция жумысларының барысы менен танысты.
Танысыў барысында университет ректоры бул обектлерде сапалы етип реконструкция жумысларын алып барыў бойынша өзиниң пикир-усынысларын билдирди.
Адилбай Оразов,
Қарақалпақстан хабар агентлиги шолыўшысы