Қәдирли перзентлерим!
Бәринен бурын, сиз, әзизлерди Венгрияның Будапешт қаласында болып өткен 45-Пүткил жер жүзилик шахмат олимпиадасында мүнәсип қатнасып, дерлик 200 мәмлекет ўәкиллери арасында сыйлы үшинши орынды ийелеп, өзбек шахматы тарийхында және бир жарқын бет ашқаныңыз бенен шын жүректен қызғын қутлықлайман.
Оғада кескин ҳәм маўасасыз беллесиўлерде сизлер жоқары ақыл, беккем ерк-ықрар ҳәм турақлылық пазыйлетлерин көрсетип, Қытай, Сербия, Армения, Германия, Әзербайжан, Словения, Испания сыяқлы мен деген мәмлекетлердиң командаларын артта қалдырғаныңыз үлкен мақтаўларға ылайықлы.
Сизлердиң тымсалыңызда Жаңа Өзбекстан жаслары мине, усындай ақыл-ой беллесиўлеринде қандай бәлент шеклерди ийелеўге уқыплы екенин көрип, кеўиллеримиз мақтаныш сезимлерине толмақта.
Усы беллесиўде жоқары интеллектуаллық потенциалын көрсеткен Нодирбек Абдусатторов, Жавоҳир Синдоров, Шамсиддин Воҳидов, Нодирбек Ёқуббоев, Жаҳонгир Воҳидов сыяқлы улларымыз ерискен нәтийжелер биз ушын оғада қәдирли.
Әсиресе, тахталар кесиминде Шамсиддин Воҳидов алтын медальды, Нодирбек Абдусатторов гүмис медальды қолға киргизип, оғада үлкен қәбилет ийеси екенин және бир мәрте дәлиллегенин айрықша атап өтиў керек.
Мәрт ҳәм батыр перзентлеримиз қатарында Афрўза Ҳамдамова, Нилуфар Ёқуббоева, Умида Омонова, Маржона Маликова, Нодира Нодиржонова сыяқлы беккем ерк-ықрарлы шахматшы қызларымыз да беллесиўлерде мүнәсип қатнасып, бар күш-ғайраты ҳәм қәбилети менен Ўатанымыздың абырайын қорғады.
Олар өткен олимпиадада көрсеткен нәтийжелерин жақсылап, 170 мәмлекет арасында 12-орынды ийелегени, итибарға ылайық, әлбетте. Жигерли қызымыз Нодира Нодиржонова тахталар кесиминде сыйлы 2-орынды ийелеп, гүмис медаль менен сыйлықланғаны айрықша қуўанышлы. Олардың бәршесин қызғын қутлықлап, келешектеги беллесиўлерде сыйлы орынларды жеңип алыўын тилеймен.
Әлбетте, Өзбекстан шахмат шеберлериниӊ қолға киргизген үлкен табысы Жаңа Өзбекстанда жасларға қаратылып атырған жоқары итибар, спорт ҳәм оның ең интеллектуаллық түри болған шахматты раўажландырыў бойынша әмелге асырылып атырған үлкен реформаларымыздың әмелий нәтийжеси, десек, дурыс болады.
Әлбетте, бундай табыслар халқымызды ийгиликли мақсетлер жолында және де бирлестиреди, мыңлаған жасларымыз ушын илҳам дәреги болып хызмет етеди.
Пурсаттан пайдаланып, сиз, әзиз перзентлериме, ерискен табысларыңызға үлкен үлес қосқан тәжирийбели устаз ҳәм тренерлериңиз, пүткил командаңыз ағзаларына, сизлерди қоллап-қуўатлап турған ата-аналарыңыз ҳәм барлық ықласбетлериңизге өзимниӊ атымнан, пүткил халқымыздыӊ атынан шын жүректен қызғын миннетдаршылық билдиремен.
Сизлерге жанжан Өзбекстанымызда 2026-жылы биринши мәрте өткерилетуғын гезектеги жәҳән олимпиадасында да ең жоқары шеклерди ийелеў несип етсин!
Бәршеңизге беккем денсаўлық, ығбал-бахыт, келешектеги оқыў ҳәм жумысларыңызда үлкен табыслар тилеймен. Жеңисли жүрислериңиз даўамлы болсын, әзиз перзентлерим!
Шавкат Мирзиёев,
Өзбекстан Республикасы Президенти